Kryetari i Komunës së Drenasit, Ramiz Lladrovci, të martën ka pritur në takim dy talentet e futbollit Lis Prokshin dhe Erdi Munishin, të cilët janë përzgjedhur nga “Barca Camp Kosova” për të marrë pjesë në prova shtesë në Barcelonë.
Dy nëntëvjeçarët nga “Akademia e futbollit Feronikeli ’74”, janë në mesin e lojtarëve të rinj nga Kosova që do të kenë mundësinë të dëshmojnë talentin e tyre në një nga shkollat më të njohura të futbollit në botë.
Kryetari Lladrovci uroi Lisin dhe Erdin për sukseset e arritura deri më tani dhe u shprehu përkrahjen e plotë në këtë hap të rëndësishëm drejt ëndrrës së tyre sportive.
“Lisi dhe Erdi janë shembull i pasionit dhe përkushtimit për sportin. Ata e kanë përkrahjen tonë dhe të gjithë qytetarëve të Drenasit. Jemi krenarë për talentet tona që po na përfaqësojnë denjësisht edhe jashtë vendit”, u shpreh Kryetari Lladrovci.
Komuna e Drenasit vazhdon të mbështesë zhvillimin e sportit dhe promovimin e të rinjve me talent, duke krijuar kushte që ata të arrijnë suksese në nivele vendore e ndërkombëtare.
