Në seancën gjyqësore ndaj të akuzuarve për njërin ndër rastet më të mëdha të narkotikëve në vend, atë të sekuestrimit të 400 kilogramëve kokainë në Komunën e Lipjanit, sot dëshmoi i akuzuari Kadri Brahimi, depoisti ku u kap sasia.
Paraprakisht, leje për t’u larguar nga seanca për arsye shëndetësore kërkoi i akuzuari tjetër, Kadri Sheqiri.
Më tej, para trupit gjykues nisi dëshminë i dyshuari Kadri Brahimi, i cili gjatë pyetjeve nënvizoi se pozita e tij në detyrën e depoistit kryesor daton që nga viti 2015. Brahimi sqaroi në detaje, hap pas hapi, procesin e arritjes së mallit dhe procedurave që ndërmerr kompania.
Sipas aktakuzës, Kadri Brahimi, paletën me substancë narkotike, me qëllim të mosidentifikimit, e ka ndarë në një pjesë të veçantë.
“Mos me pas hy policia, me u palu nëpër depoja, ata mall ka pas mundësi me shku nëpër krejt marketet e krejt Kosovës, se na paketat nuk i hapim edhe mu nuk më intereson a ka gur a qese a çka ka në to”, ka deklaruar Brahimi.
Ndërkohë që dëshmitë për të dyshuarit që akuzohen se përmes kompanisë “MC FOOD” kishin lidhur marrëveshje me kompaninë “SEARA”, për importin e produkteve të mishit të pulës së ngrirë, por sipas prokurorisë në to ishin vendosur substanca narkotike po vazhdojnë, mbrëmë policia kapi edhe 250 kilogram të tjera substancë narkotike të fshehura në një kamion.
Në një aksion të përbashkët, me Prokurorinë Speciale, Doganën dhe Agjencinë për Inteligjencë, kapja e substancave narkotike në një kamion që lëvizte në autostradën Ibrahim Rugova, rezultoi në një të arrestuar që vazhdon të jetë në mbajtje.
Drejtori i drejtorisë së antidrogës, Reshat Murseli deklaroi për televizionin publik se bazuar në informacionet që ka departamenti, droga dyshohet se nuk ishte e destinuar për tregun e Kosovës.
“Në bazë të vendit të ngjarjes, diku 205 paketime janë e që pesha sigurisht përafërsisht se nuk mund të jemi shumë të sigurt por kalon mbi 250 kg”, ka thënë Murseli.
Me vendim të Prokurorit, i dyshuari është arrestuar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope ose analoge”.
