Eurodeputeti austriak Andreas Schieder ka vlerësuar përparimin e Shqipërisë në procesin e integrimit evropian, duke theksuar se vendi po ndërmerr reforma të mëdha dhe po tregon seriozitet në rrugëtimin drejt Bashkimit Evropian.
Gjatë takimit të përbashkët të Parlamentit Evropian dhe Kuvendit të Shqipërisë, Schieder u shpreh se diskutimet me deputetët shqiptarë nga të gjitha partitë ishin intensive dhe të frytshme, duke treguar përkushtim të lartë për procesin e integrimit.
“Shqipëria është një vend me rreth 90% qytetarë pro-evropianë. Ndërsa në Europë ka vende ku qytetarët janë më skeptikë ndaj zgjerimit të BE-së, si në Austri, e cila është ndër pesë popullatat më skeptike është detyra jonë të mos e pranojmë këtë si pengesë, por të shpjegojmë se zgjerimi sjell mundësi për të gjithë”, u shpreh Schieder.
Sipas tij, zgjerimi i BE-së nuk është vetëm një proces teknik që përfshin hapjen e kapitujve dhe përfundimin e “screening”-ut, por një proces që duhet të ketë ndikim real në jetën e qytetarëve.
Schieder theksoi se lufta kundër korrupsionit, krimit të organizuar dhe krijimi i një sistemi gjyqësor funksional mbeten ndër sfidat kryesore të vendit, por shtoi se procesi po ecën në drejtimin e duhur.
“Nuk bëhet fjalë vetëm për ligje në letra, por për ndryshime që ndikojnë në jetën e përditshme të qytetarëve. Shqipëria po ndërmerr ndryshime shumë të mëdha dhe po e tregon veten si një vend që e merr seriozisht rrugën drejt BE-së. Shqipëria po heton në mënyrë të thelluar këdo, qoftë nga qeveria, opozita apo biznesi. Kjo tregon se vendi po forcon standardet e drejtësisë, në përputhje me ato evropiane. Sistemi gjyqësor duhet të jetë për prokurorët dhe gjyqtarët, jo për politikanët”, deklaroi ai.
Schieder theksoi se përfitimi më i madh nga integrimi europian do të jetë për qytetarët shqiptarë, të cilët do të mund të gëzojnë një jetë më të mirë dhe standarde më të larta europiane. Në përfundim të fjalës, eurodeputeti u bëri thirrje partive politike që të bashkëpunojnë për integrimin e vendit.
“Apeli im për politikanët shqiptar: punoni më mirë bashkë. Shumica të ftoj opozitën t’i dëgjojë çfarë ata duan dhe opozita të jetë e gatshme për të marrë pjesë“, përfundoi ai./ata
