Rrjeti i Organizatave Joqeveritare AVONET ka dorëzuar në Gjykatën Themelore në Prishtinë, Departamentin për Çështje Administrative, padinë për anulimin e vendimit të Qeverisë në detyrë të Republikës së Kosovës, nr. 02/273, të datës 31.10.2025, që lidhet me miratimin e projektligjit mbi ndarjet buxhetore për vitin 2026.
Sipas komunikatës së dërguar për media nga AVONET, së bashku me padinë, është propozuar edhe vendosja e një mase të përkohshme sigurie për pezullimin e ekzekutimit të vendimit deri në marrjen e vendimit përfundimtar nga gjykata, duke u bazuar në nenet 99 dhe 100 të Ligjit për Konfliktet Administrative.
Në padinë e dorëzuar, AVONET kanë theksuar se Qeveria në detyrë ka vepruar në kundërshtim me Kushtetutën e Republikës së Kosovës dhe me dispozitat e Ligjit Nr. 08/L-117 për Qeverinë e Republikës së Kosovës, të cilat kufizojnë kompetencat e saj vetëm në çështje të domosdoshme administrative. Organizata vlerëson se miratimi i projektligjit për ndarjet buxhetore përbën tejkalim të kompetencave dhe shkelje të parimit të ndarjes së pushteteve, duke pasur parasysh se disa anëtarë të kabinetit qeveritar janë njëkohësisht deputetë të Kuvendit të Kosovës.
AVONET po ashtu kanë kërkuar që Gjykata të anulojë vendimin si të paligjshëm dhe antikushtetues, si dhe të pezullojë efektet e tij deri në vendimin përfundimtar.
Ky veprim, sipas AVONET, synon mbrojtjen e rendit kushtetues, ndarjes së pushteteve dhe integritetit institucional, duke siguruar që proceset buxhetore të zhvillohen në përputhje me mandatet legjitime dhe parimet demokratike të Republikës së Kosovës.
