Një person është therur me thikë sot rreth orës 14:30 në rrugën “Zahir Pajaziti” në Podujevë.
Sipas Policisë së Kosovës, i lënduari është dërguar për trajtim mjekësor, ndërsa dy persona të dyshuar janë arrestuar në lidhje me rastin.
“Bazuar në të dhënat fillestare, në këtë rast nga një mjet i mprehtë është lënduar një person. I njëjti është dërguar për trajtim mjekësor, ndërkohë që policia ka arrestuar dy persona të dyshuar lidhur me këtë rast dhe ka sekuestruar dy thika,” ka bërë të ditur zëdhënësja e Policisë për rajonin e Prishtinës, Flora Ahmeti.
Hetuesit policorë, në koordinim me prokurorinë, po vazhdojnë punën për zbardhjen e plotë të rrethanave të ngjarjes.
