Janë bërë pesë vjet nga arrestimi i ish-krerëve të Ushtrisë Çlirimtare të Kosovës (UÇK): Hashim Thaçit, Kadri Veselit, Jakup Krasniqit dhe Rexhep Selimit.
Organizatat e dala nga Lufta e UÇK-së në pesë vjetorin e arrestimit kanë thënë se ish-udhëheqësit po përballen me një padrejtësi të madhe, ndaj së cilës theksojnë se nuk do të dorëzohen.
“Pesë vite padrejtësi, pesë vite që heronjtë e lirisë mbahen larg familjeve dhe vendit për të cilin luftuan. Ne nuk harrojmë dhe nuk dorëzohemi përballë kësaj padrejtësie historike”, thuhet në reagimin e OVL-UÇK-së.
Më 5 nëntor të vitit 2020, Hashim Thaçi dha dorëheqje nga posti i Presidentit të Kosovës, pasi Dhomat e Specializuara konfirmuan aktakuzën ndaj tij dhe tre ish-bashkëluftëtarëve të tij.
Në të njëjtën ditë, ish-kryetari i Kuvendit të Kosovës, Kadri Veseli, njoftoi se do të udhëtonte drejt Hagës pas konfirmimit të aktakuzës.
Ndërsa një ditë më herët, më 4 nëntor 2020, Jakup Krasniqi ishte nisur drejt Qendrës së Paraburgimit në Hagë. Po atë ditë, edhe Rexhep Selimi njoftoi se kishte marrë konfirmimin e aktakuzës dhe ishte nisur për në Hagë.
