Zëdhënësi i Kremlinit, Dmitry Peskov, komentoi deklaratën e Presidentit serb Aleksandar Vuçiç se Serbia është e gatshme t’i shesë municione Bashkimit Evropian, pavarësisht se ku përfundojnë më vonë, raporton RIA Novosti.
“Rusia e kupton se ndaj Serbisë po ushtrohet një presion i paparë”, tha Peskov.
“Ne e kuptojmë presionin e paparë që u ushtrohet mbi serbët. Pra, historia atje nuk është aspak e lehtë. Ne i kuptojmë vështirësitë me të cilat po përballen serbët”, u përgjigj Peskov kur iu kërkua të komentonte deklaratën e Vuçiçit se republika është gati t’i shesë municione BE-së.
Çfarë i ofroi Vuçiq Evropës?
Në një intervistë me revistën gjermane Cicero, Vuçiç tha se Evropa ka nevojë për municione dhe konfirmoi se u ofroi miqve të tij në Evropë një marrëveshje për të blerë gjithçka që ka Serbia, të cilën e përshkroi si një kontribut fenomenal për sigurinë evropiane.
Vuçiç vuri në dukje se depot serbe të municioneve janë plot, me rezerva veçanërisht të mëdha predhash mortaje. Kur u pyet për mundësinë që municionet e blera nga Serbia t’i dorëzohen më pas Ukrainës, Vuçiç tha se blerësit do të jenë në gjendje të bëjnë çfarë të duan me to.
Ai shtoi se atyre thjesht u duhen kontrata afatgjata në mënyrë që të mund të planifikojnë përpara. Ai përsëriti se gjithmonë ka pohuar se Serbia është një vend neutral, por se është absolutisht e gatshme të bashkëpunojë me miqtë evropianë në çështjet ushtarake dhe se tani është duke pritur përgjigjet e vendeve evropiane për propozimin e saj.
Në maj, Shërbimi i Inteligjencës së Jashtme i Rusisë u ankua se kompanitë serbe të mbrojtjes, pavarësisht neutralitetit të deklaruar të Beogradit, vazhduan të furnizonin Kievin me municione. Gjatë verës, Moska i përsëriti akuzat, duke e përshkruar problemin si të dhimbshëm si për Rusinë ashtu edhe për Serbinë. Pas kësaj, Vuçiç njoftoi pezullimin e eksporteve të municioneve.
