Një fëmijë 1.5-vjeçar ka humbur jetën në Spitalin e Përgjithshëm në Pejë, pas një trajtimi mjekësor të ofruar nga stafi i spitalit. Sipas njoftimit të Policisë, prindi i fëmijës ka raportuar se më 5 nëntor 2025 e ka sjellë fëmijën në spital për shkak të një gjendje të rëndë shëndetësore. Pas trajtimit, fëmija ishte liruar dhe dërguar në shtëpi me rekomandimin që të vazhdonte mbikëqyrjen dhe të kthehej në spital në rast nevoje.
Sidoqoftë, më 6 nëntor, fëmija u kthye në spital në gjendje kritike, ku përpjekjet për të shpëtuar jetën e tij nuk patën sukses.
Spitali i Përgjithshëm në Pejë ka reaguar për këtë rast, ku thuhet se fëmija ishte pranuar për herë të parë në spital rreth orës 22:15 të datës 5 nëntor me ankesa për të vjella.
“Në mëngjesin e datës 6 nëntor 2025, rreth orës 07:00, fëmija është sjellë sërish në spital, këtë herë në gjendje të rëndë, me çrregullime të vetëdijes dhe probleme serioze në frymëmarrje. Menjëherë është trajtuar nga ekipi i mjekëve me oksigjen dhe terapi mbështetëse, por për shkak të përkeqësimit të gjendjes është kryer intubimi nga ekipi i anesteziologëve. Pavarësisht masave reanimatore të ndërmarra me përkushtim dhe sipas protokolleve mjekësore, fatkeqësisht fëmija ka ndërruar jetë në orën 08:50”, thuhet në reagim .
Spitali i Përgjithshëm ka theksuar se janë ndjekur të gjitha protokollet mjekësore dhe se janë informuar organet kompetente për hetimin e rastit. Në përputhje me procedurat ligjore, Policisë i është dhënë informacion në kohë reale për ngjarjen.
“Ne shprehim ngushëllimet më të sinqerta për familjen e fëmijës dhe qëndrojmë të gatshëm për të ofruar çdo informacion dhe bashkëpunim me autoritetet përgjegjëse,” thuhet në reagimin zyrtar të Spitalit të Përgjithshëm të Pejës.
Tutje theksohet se Spitali mbetet në dispozicion të institucioneve përgjegjëse për çdo sqarim shtesë.
