Gjykata Kushtetuese është ende duke e shqyrtuar ankesën e pranuar nga Lista Serbe lidhur me zgjedhjen e nënkryetarit të Kuvendit nga radhët e komunitetit serb.
Në ankesë pretendohet se janë shkelur Kushtetuta, Rregullorja e punës së Kuvendit, si dhe një aktgjykim i mëparshëm i Gjykatës Kushtetuese.
Megjithatë nuk ka ende një vendim nga Kushtetuesja lidhur me këtë ankesë të dorëzuar më 16 tetor nga Lista Serbe.
Njohës të çështjeve politike vlerësojnë se kjo çështje duhet të trajtohet me prioritet që të mos bëhen shkelje të tjera në proceset tutje.
“I bie që edhe vendimi ose nominimi i presidentes për kryeministrin i bie që të hidhet poshtë dhe të fillohet që nga e para, pra që nga zgjedhja e nënkryetarit të pestë nga komuniteti serb.
Kushtetuesja thotë dhe rregullorja e Kuvendit e ndryshuar ne 2022 thotë se nënkryetari serb zgjidhe nga shumica e komunitetit serb Brenda kuvendit të Kosovës? është mirë që Kushtetuesja ta sqarojë një herë e përgjithmonë që të mos kemi këso dilema në zgjedhjen e nënkryetarëve të Kuvendit”, ka thënë analisti Sadik Zeqiri.
“Ankesa e paraqitur nga Lista Serbe në Kushtetuese mund të ndikoj drejtpërdrejtë në ecurinë e procesit të ndërtimit të institucioneve të reja. Kjo për faktin se çdo vendim për masë të përkohshme do të mund të pezullonte veprimtarinë e parlamentit përfshirë edhe procedurat për votimin e qeverisë së re”, ka thënë analisti Argjend Zejnaj.
Kushtetuesja kishte trajtuar ankesën e dorëzuar më herët nga Lista Serbe lidhur me çështjen e nënkryetarëve, pasi kryetari i ri i Kuvendit, Dimal Basha, e kishte shpallur të konstituuar Kuvendin pa zgjedhjen e nënkryetarit të pestë nga radhët e komunitetit serb.
Në vendimin që mori Kushtetuesja për ankesën e parë nga Lista Serbe, u tha se propozimi për nënkryetarin nga radhët e komuniteteve jo-shumicë, në këtë rast të pakicës serbe, duhet të bëhet nga shumica apo numri më i madh i deputetëve nga radhët e deputetëve të komunitetit serb.
