I bindur se prishtinasit nuk kanë pasur asnjëherë zgjidhje më të mirë të të votuar për kryetar të Komunës sesa Hajrulla Çekun, kryetari i LVV-së, Albin Kurti, u kërkoi kryeqytetasve, votën për kandidatin e kësaj partie. Ai tha se vizioni që Çeku paraqet, mundëson mirëqenie për të gjithë qytetarët. E vetë Çeku tha se programi që ofron, është konkret dhe sjell zgjidhje, që nga gjelbërimi e deri te trafiku e infrastruktura.
Prishtina ishte komuna e fundit ku Lëvizja Vetëvendosje e ka mbyllur fushatën elektorale. Kryetari i Vetëvendosjes, Albin Kurti, iu bëri thirrje prishtinasve, që ta votojnë kandidatin për kryetar të kryeqytetit Hajrulla Çekun, si një mundësi të cilën nuk e kanë pasur asnjëherë më parë.
“Na duhet një kryeqytet që shkëlqen nga pastërtia, na duhet rendi i ri urban. Me punën e vet në kryeqytet qytetari blen banesë, prandaj për kryeqytet të pastër zgjidhni Hajrën që t’ua shohë hajrin shtëpia e familja”, tha Kurti.
Kandidati për kryetar të Prishtinës nga Vetëvendosje, Hajrulla Çeku theksoi se vizioni i tij qeverisës do t’i mundësojë përmirësim e mirëqenie për gjithsecilin banorë të kryeqyteti, duke thënë se një epokë e re për Prishtinën do të fillojë qysh në nisje të mandatit të tij.
“Prishtina 2035, një qytet funksional, i drejt, i gjelbër e i barabartë. Një qytet që të mbush me jetë. Do ta përmirësojmë trafikun me transport publik enkas me korsi dhe shkolla moderne”, tha ai.
Kandidati i Lëvizjes Vetëvendosje për kryetar të Prishtinës, ka për kundërkandidat në balotazh atë të Lidhjes Demokratike të Kosovës.
