Kompania Lonvi Biosciences po punon për një ilaç të bazuar në ekstraktin e farave të rrushit që mund të ngadalësojë procesin e plakjes.
Sipas New York Times, një kompani kineze e bioteknologjisë, Lonvi Biosciences, me seli në Kinën jugore, po punon për zhvillimin e pilulave që mund të ngadalësojnë ose edhe të ndalojnë disa procese biologjike të plakjes.
Drejtori teknik i kompanisë, Liu Qinghua, tha se “jetesa deri në 150 vjet do të jetë e mundur – dhe në të ardhmen e afërt”.
Ilaçi që po zhvillon kompania bazohet në një përbërës natyror të quajtur procianidin C1 (PCC1), i cili gjendet në ekstraktin e farave të rrushit. Sipas hulumtimeve nga shkencëtarët në Shangai, kjo substancë mund të zgjasë jetëgjatësinë e minjve duke shkatërruar qelizat e vjetra dhe jofunksionale, të ashtuquajturat “qeliza të plakura”, të cilat përshpejtojnë plakjen e trupit.
Megjithatë, ekspertët paralajmërojnë se ky është një hulumtim i hershëm dhe se rruga drejt aplikimit tek njerëzit është e gjatë.
Vetë studiuesit e kompanisë pranojnë se ideja e “mposhtjes së plotë të vdekjes” është ende më shumë një vizion filozofik sesa një realitet mjekësor.
Projekti Lonvi Biosciences po tërheq vëmendjen sepse përputhet me një trend në rritje të kompanive të bioteknologjisë që kërkojnë ta shndërrojnë zgjatjen e jetës në një industri të re.
