Në emision, gazetari i ri foli për pyetjen që bëri gjatë konferencës për shtyp në Bruksel dhe tha se mori shumë komplimente.“Mora shumë komplimente, madje edhe nga kolegë me më shumë përvojë se unë. Njëri më tha: ‘Kjo ishte e vetmja pyetje logjike që duhet të kisha bërë në atë moment’. Ishte një kënaqësi e madhe për mua. Ishte hera ime e parë atje… dhe më kushtoi gjithçka”, tha Nunziati.
Kur u pyet nëse mori një shpjegim më të detajuar nga ish-punëdhënësi i tij, agjencia Nova, se pse u pushua nga puna, Nunziati u përgjigj.
“Më informuan se pyetja ishte teknikisht e pasaktë dhe nuk u vlerësua. Ka një erozion të vazhdueshëm të lirisë së shtypit në Itali”, tha ai.
Pikërisht në këtë puntatë të emisionit Nunziati mori një ofertë pune live nga Agnese Pini, drejtoreshë e Quotidiano Nazionale, rrjet i grupit Monrif që përveç “La Nazione” bashkon edhe gazetat “Il Giorno”, “Il Resto del Carlino” dhe “Il”.
Shoqata Italiane e Gazetarëve reagoi gjithashtu ndaj gjithë rastit.
“Nuk mund të pushohesh nga puna për shkak se ke bërë një pyetje. Roli i një gazetari, pavarësisht mbrojtjes kontraktuale, është të bëjë pyetje që mund të jenë të pakëndshme ose të padëshirueshme”, thanë ata.
Ju kujtojmë se gjatë konferencës për shtyp të mbajtur më 13 tetor, Nunziati e pyeti zëdhënësen e Komisionit Evropian pse Izraelit nuk iu kërkua të financonte rindërtimin e Gazës.
“Ju ia kërkoni këtë Rusisë kur flasim për Ukrainën. A mendoni se Izraeli duhet të paguajë për rindërtimin e Gazës, veçanërisht kur marrim parasysh se ata shkatërruan pothuajse të gjithë infrastrukturën civile?” pyeti Nunziati.
Pinho tha se kjo është një “pyetje interesante”, por se ajo nuk ka një përgjigje të gatshme për të.
