Drejtori i Përgjithshëm i Shërbimit Korrektues të Kosovës, Ismajl Dibrani, ka bërë të ditur se sot ka nënshkruar një marrëveshje të rëndësishme bashkëpunimi me Institutin për Edukim dhe Hulumtim Nexus.
Sipas njoftimit të Dibranit, ky partneritet realizohet për herë të parë që nga themelimi i SHKK-së dhe shënon një hap të ri në përmirësimin e sistemit korrektues në vend. Ai theksoi se gjatë viteve të fundit është bërë reformë e thellë në programet rehabilituese, duke shumëfishuar numrin e të burgosurve të përfshirë në programe që fokusohen në aftësim, zhvillim personal dhe rikthim të shëndoshë në shoqëri.
Në njoftimin e tij, Dibrani thekson se marrëveshja e sotme parasheh: vlerësimin dhe matjen shkencore të efektivitetit të programeve rehabilituese; zhvillimin e hulumtimeve profesionale në institucionet korrektuese; mbështetjen e stafit përmes trajnimeve me standarde ndërkombëtare; vendosjen e një sistemi modern, të bazuar në evidencë dhe rezultate konkrete.
Sipas Dibranit, kjo marrëveshje, e realizuar me një ekip profesionistësh të shkolluar në Kosovë, Evropë dhe SHBA, do të ndihmojë në ndërtimin e reformave të qëndrueshme dhe të matshme në Shërbimin Korrektues.
“Ne ndërtojmë një sistem modern, transparent dhe të orientuar drejt rehabilitimit real,” ka deklaruar Dibrani, duke theksuar se SHKK po ecën drejt standardeve më të larta profesionale për të mirën e shoqërisë dhe sigurisë publike.
