Sindikata e Bashkuar e Arsimit, Shkencës dhe Kulturës e Kosovës (SBASHK) ka dalë në përkrahje të protestës që për nesër është thirrur nga Sindikata e Punëtorëve të RTK-së (SPERTK).
SBASHK-u thotë se ka ndjekur me vëmendje situatën e krijuar në RTK dhe shpreh shqetësimin e thellë për faktin se më 12 nëntor, punëtorët e RTK-së ende nuk kanë marrë pagat e muajit tetor.
“Kjo gjendje është e papranueshme dhe përbën cenim të drejtpërdrejtë të dinjitetit të punëtorit. SBASHK-u i bën thirrje urgjente Qeverisë në detyrë që të gjejë menjëherë zgjidhje dhe të alokojë mjetet e nevojshme për pagesën e pagave, jo vetëm për muajin tetor, por edhe për muajt në vijim, në mënyrë që të garantohet funksionimi normal i RTK-së dhe mirëqenia e punëtorëve të saj”, thuhet në komunikatën që ka lëshuar SBASHK-u.
Kanë treguar se nesër do të jenë pjesë e protestës në mbështetje të punëtorëve të RTK-së, derisa kanë paralajmëruar se nëse situata nuk ndryshon, nuk e përjashtojnë mundësinë e mobilizimit të të gjithë anëtarësisë në solidarizim me punëtorët e RTK-së.
“Në shenjë solidariteti e përkrahjeje sindikale, Kryesia e SBASHK-ut do të marrë pjesë në protestën e nesërme të organizuar nga Sindikatën e Punëtorëve të RTK-së. Gjithashtu, SBASHK-u nuk përjashton mundësinë që, nëse kjo situatë vazhdon, të mobilizojë të gjithë anëtarësinë e saj – nga çerdhet e deri në universitete – për t’u solidarizuar me kolegët e RTK-së, sepse solidariteti ndërmjet punëtorëve është shtylla më e fortë e lëvizjes sindikale”, thotë SBASHK-u.
Sindikata e Bashkuar e Arsimit, Shkencës dhe Kulturës e Kosovës thotë se do të jetë gjithmonë në krah të çdo punëtori që lufton për dinjitetin dhe të drejtën e tij.
RTK deri tash ka marrë përkrahje edhe nga sindikata të tjera në vend si dhe nga organizata vendore e ndërkombëtare.
