Agjencia britanike e lajmeve Reuters njoftoi sot për herë të parë se “Serbia ka siguruar një vonesë tremujore në sanksionet kundër NIS”, por më pas e ndryshoi lajmin, titulli i të cilit tani është: “Ministri i Energjisë thotë se kompania e naftës NIS, e sanksionuar nga SHBA-ja, ka tre muaj kohë për të gjetur një blerës”.
Reuters shkruan se “NIS, aksionet kryesore të së cilës mbahen nga prodhuesi rus i naftës Gazpromneft, po përballet me sanksione të SHBA-së pas skadimit të përjashtimit” që mori më parë dhe tregon se “operacionet e NIS janë në rrezik ndërsa bankat pezullojnë pagesat”.
“Serbia mori një licencë tremujore nga SHBA-ja për të provuar të gjejë një blerës për kompaninë e saj të naftës NIS, e cila është nën sanksione që kërcënojnë furnizimin me karburant përpara dimrit, tha sot Ministrja e Energjisë Dubravka Đedović-Handanović”, shkruan agjencia.
Reuters kujton se “Serbia njoftoi këtë javë se Gazprom Neft (SIBN.MM) dhe Gazprom (GAZP.MM) e Rusisë – të cilat së bashku mbajnë një aksion kontrollues prej 56 përqind në rafinerinë e vetme të naftës në vend (NIIS.BEL), i kanë dërguar një kërkesë Zyrës së Kontrollit të Aseteve të Huaja (OFAC) të Departamentit të Thesarit të SHBA-së, duke deklaruar gatishmërinë e tyre për t’ia dorëzuar kontrollin e kompanisë një pale të tretë”.
Qeveria e Serbisë ka njoftuar se nesër do të mbajë një takim për këtë çështje, në të cilin janë ftuar drejtorët e të gjitha kompanive publike, dhe do të jetë i pranishëm edhe Presidenti i Serbisë, Aleksandar Vuçiq.
Ministrja e Energjisë, Đedović-Handanović, u tha gazetarëve në Beograd sot se administrata amerikane “ishte e qartë”: se dëshiron një ndryshim të plotë të pronësisë së NIS dhe kërkon tërheqjen e plotë të pronësisë ruse nga kompania, dhe “ajo që është një mesazh i vështirë për ne është se nuk na është dhënë asnjë ditë që NIS të vazhdojë të operojë”.
