Prej tre muajsh, mbi 170 punëtorë që kujdesen për sigurinë e institucioneve në Komunën e Prishtinës nuk kanë marrë pagat e tyre. Për këtë arsye, punëtorët e kompanisë private, të kontraktuar nga Komuna e Prishtinës, kanë protestuar sot para objektit të Komunës, duke kërkuar zgjidhje të menjëhershme dhe respektim të të drejtave të tyre.
Shumë institucione publike dhe private në Komunën e Prishtinës kanë mbetur pa mbikëqyrje sigurie, pasi punëtorët e angazhuar përmes një kompanie private të kontraktuar nga Komuna e Prishtinës kanë ndërprerë punën. Arsyeja kryesore është mungesa e pagave dhe kontratave të rregullta. Për këtë shkak, punëtorët protestuan sot para ndërtesës së Komunës së Prishtinës.
“Është muaji i tretë. Ka persona këtu që kanë kredi dhe janë të sëmurë, kanë familje dhe fëmijë nëpër shkolla. U duhen pagat, dhe përveç kësaj kanë edhe obligime shtetërore”, tha Bedri Haradinaj, punëtor i sigurimit.
“Unë punoj në çerdhen në Dardani, e mbaj familjen. Duhet t’i paguaj obligimet si rryma dhe mbeturinat. Nuk na paguajnë as ndërrimin e natës, as pushimet vjetore”, tha Muharrem Jonuzi, punëtor.
Punëtorët theksuan se do ta ndalin punën deri në gjetjen e një zgjidhjeje.
Drejtoria për Siguri dhe Emergjenca në Komunën e Prishtinës ka njoftuar se përmes Drejtorisë së Financave, ka bërë kërkesë zyrtare që nga java e kaluar për të mundësuar procedimin e pagesave për kategorinë e shërbimeve të sigurisë ndaj punëtorëve të sigurimit. Megjithatë, për shkak të bllokimit të mjeteve financiare të Kryeqytetit, deri më sot nuk ka pasur mundësi të realizojë pagesat e nevojshme, pavarësisht thonë përkushtimit tyre për ta zgjidhur këtë çështje në kohë.
