Këtë vit Krishtlindja “mbërriti” në Sofje që në nëntor, me aromë të verës së ngrohtë, kanellës dhe magjisë festive. Radio Bullgaria ju rekomandon të vizitoni disa prej këndeve të Krishtlindjes në kryeqytet:
Për më të paduruarit për të pritur festën
Që nga mesi i nëntorit, Pazari Gjerman i Krishtlindjes Deutscher Weihnachtsmarkt Sofia e shndërroi Kopshtin e Qytetit para Teatrit Popullor “Ivan Vazov”, duke e kthyer në një fshat romantik gjerman. Deri më 21 dhjetor, shtëpizat prej druri me emra gjermanë do të na joshin me bratwurst aromatikë, ëmbëlsira dhe verë të ngrohtë me kanellë dhe karafil. Skena qendrore e pazarit do të gjallërohet çdo ditë me teatër për fëmijë, kore shkollash dhe koncerte mbrëmjeje, dhe pas orës 18:00 Babagjyshi i Vitit të Ri do të jetë mysafir në pazar dhe do të gëzojë të vegjlit dhe të rriturit me praninë dhe humorin e tij. Një pjesë e të ardhurave do të ndahen për bamirësi, duke e kthyer festën edhe në një gjest ndaj njerëzve në gjendje të pafavorshme.
Magjia e Krishtlindjes shpërngulet edhe para Qendrës Kombëtare të Kulturës (NDK)
Disa ditë më vonë, më 21 nëntor, atmosfera festive do të pushtojë edhe zonën e Pallatit Kombëtar të Kulturës me Sofia Christmas Fest 2025. Atje do të ketë tezga të mjeshtërve artizanë dhe prodhuesve të suvenirëve autentikë bullgarë. Në shesh, mbi 40 shtëpiza prej druri, rrota panoramike, pistë akulli dhe skenë për koncerte do të presin banorët e kryeqytetit dhe mysafirët e qytetit deri në fund të dhjetorit. Pranë bredhit të madh të Krishtlindjes do të përhapet aromë pishe dhe ëmbëlsirash të parezistueshme festive, ndërsa muzika dhe buzëqeshjet e shitësve dhe vizitorëve do të krijojnë ndjesi festimi dhe ngrohtësie.
Pista e akullit në Kopshtin e Princit
Me ardhjen e ditëve të para të ftohta, Ice Park Sofia në Kopshtin e Princit do të shndërrohet për të disatin vit në vend për argëtime dimri. Pista e madhe e akullit në zemër të qytetit të ngarkuar shtrihet në rreth 4 000 m². Këtu mund të merrni me qira patina dhe të rrëshqisni në shtegun e veçantë për më të guximshmit, ose të zgjidhni pajisjet trajnimi për fillestarët. Ndërsa menjëherë pranë akullit do të shfaqet edhe një tjetër pazar Krishtlindjeje, me ushqim aromatik, pije të ngrohta dhe koncerte nga artistë të dashur.
Dhurata të punuara me dorë mes rrënojave nga kohët e lashta
Nëse kërkoni dhurata origjinale Krishtlindjeje dhe frymë artistike, mund të vizitoni Mish Mash Fest Christmas Edition 2025. Pazari do të zhvillohet nga 12 deri më 14 dhjetor në Largon pranë kompleksit antik Serdika, në zemër të kryeqytetit tonë të lashtë. Organizatorët kanë ftuar krijues dhe dizajnerë bullgarë, të cilët do të ofrojnë punime të punuara me dorë, qeramikë, bizhuteri, aksesorë dhe tundime festive për shijen. Do të ketë gjithashtu punëtori krijuese, performanca muzikore, si dhe iniciativa të ndryshme, që të kontribuojnë për atmosferën festive të qytetit.
Vera dhe atmosfera dimërore
Më 14 dhjetor, mes dritave të Krishtlindjes së Sofjes, do të hapë sërish dyert Christmas Wine Market 2025. Ngjarja njëditore do të zhvillohet në ambientin elegant të Klub-it Ushtarak Qendror. Vizitorët do të kenë mundësi të takohen me 23 ekspozues dhe të provojnë gjithsej 200 lloje verërash nga korrje të vjetra dhe varietete të përzgjedhura me kujdes. Disa prej tyre janë të disponueshme vetëm në enotekat e kantinave. Do të ketë degustime edhe të verërave të shkëlqyera nga importues të përzgjedhur me kujdes nga jashtë, si dhe seri të limituara butike nga Bullgaria.
Pritet që edhe pazaret e lagjeve të sjellin ngrohtësinë dhe rehatinë e tyre në hapësirën urbane, me zbukurime të punuara me dorë, me muzikë dhe punëtori për fëmijë. Sofja sërish do të ngjasojë me një përrallë dimri… vetëm dimri të vendosë të na gëzojë me borë!/RB
