Prokuroria Themelore në Prizren, Departamenti i Krimeve të Rënda, ka ngritur aktakuzë kundër dy të pandehurve A.B. dhe E.Sh., për shkak të dyshimit të bazuar mirë se të njëjtit, në bashkëkryerje, kanë kryer veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” nga neni 267 paragrafi 2, lidhur me nenin 31 të Kodit Penal të Republikës së Kosovës (KPRK).
Sipas aktakuzës, më datë 16.07.2025, në Prizren, të pandehurit A.B. dhe E.Sh., duke vepruar në bashkëkryerje dhe pa autorizim, kanë shpërndarë dhe ofruar për shitje substanca narkotike të llojit “marihuanë”, të siguruara përmes rrugëve ilegale.
I pandehuri E.Sh., duke përdorur veturën e tij, ka shkuar në shtëpinë e A.B., ku ka marrë një çantë të zezë me 18 qese me narkotikë të llojit “marihuanë”, dhe më pas janë takuar me L.K. dhe E.K., të cilëve u kanë shitur sasi të narkotikëve.
Pas kryerjes së shitblerjes, policia ka reaguar dhe i ka ndaluar të pandehurit në flagrancë. Gjatë tentimit për t’u larguar nga vendi i ngjarjes, i pandehuri A.B. ka hedhur në tokë çantën e zezë që përmbante 18 qese najloni me substancë narkotike të llojit “marihuanë”, me peshë 60.97 gram. Gjithashtu, gjatë bastisjes në shtëpinë e A.B., janë sekuestruar shtatëdhjetë e tetë (78) qese najloni me substancë të dyshuar narkotike, të cilat, pas ekzaminimit dhe ekspertimit nga Laboratori i Agjencisë Kosovare për Forenzikë, kanë rezultuar të jenë të llojit “marihuanë”, me peshë totale prej 2 kg.
Prokurori i çështjes, me ngritjen e aktakuzës, ka propozuar konfiskimin e mjeteve dhe sendeve që kanë mundësuar kryerjen e veprës penale dhe atyre që përbëjnë dobi pasurore të fituar me vepër penale, ndër të tjera: narkotikë me peshë totale prej 2 kg, një (1) automjet, të holla kesh, etj.
Gjithashtu, prokurori i çështjes ka propozuar që, pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartcekur të shpallen fajtorë për veprën penale për të cilën akuzohen dhe të dënohen sipas ligjit.
