Presidenti i Shqipërisë, Bajram Begaj, ndodhet në Pragë, ku u prit nga Presidenti i Republikës Çeke, Petr Pavel.
Gjatë takimit, Begaj vlerësoi marrëdhëniet 103-vjeçare midis dy vendeve, të cilat, sipas tij, bazohen në partneritet, vlera demokratike dhe aspirata të përbashkëta evropiane.
Begaj shprehu mirënjohjen për mbështetjen e vazhdueshme që Çekia i ka dhënë Shqipërisë në procesin e integrimit evropian.
“Marrëdhëniet midis dy vendeve kanë një traditë të gjatëbashkëpunimi dhe historie. Kjo marrëdhënie diplomatike 103-vjeçare, shënon një kapitull të ri, një kapitull të ri, i cili është bazuar në partneritet, në vlera të përbashkëta demokratike dhe aspirata evropiane. Gjatë bisedimeve tona riafirmuam vendosmërinë për të thelluar bashkëpunimin dypalësh në të gjitha fushat me interes të ndërsjellë. Shpreha mirënjohjen time për mbështetjen e vazhdueshme që Republika Çeke i ka dhënë Shqipërisë në procesin e integrimit evropian.
Çekia ka qenë dhe mbetet një zë i fortë në Bashkimin Evropian për zgjerimin e bazuar në meritë dhe gjithëpërfshirës. Çekia është një mbështetëse e palëkundur e Shqipërisë në rrugën e saj evropiane”, tha Begaj.
Në deklaratën e tij, Presidenti Begaj theksoi se Shqipëria ka bërë përparime të qëndrueshme në procesin e integrimit evropian, duke nënvizuar vlerësimet pozitive të progres-raportit dhe hapjen e të gjitha grupkapitujve.
“Shqipëria ka bërë përparime në procesin e integrimit dhe ritmet e saj kanë qenë të qëndrueshme për të përafruar legjislacionin me politikat evropiane. Progresi i Shqipërisë mori së fundmi edhe vlerësime pozitive nga progres-raporti dhe këtë javë arritëm hapjen e të gjithë grupkapitujve, që e bënë më realist objektivin tonë për mbylljen e të gjithë grupkapitujve në vitin 2027 dhe për anëtarësimin e plotë deri në vitin 2030”, tha ai.
Begaj falënderoi homologun çek edhe për hapat pozitivë ndaj Kosovës, duke përfshirë hapjen e Ambasadës së Kosovës në Pragë.
“Shqipëria i është mirënjohëse Çekisë për hapat pozitivë në drejtim të marrëdhënieve me shtetin më të ri të Evropës, të Kosovës, ku dëshiroj të falënderoj Presidentin për hapjen e Ambasadës së Kosovës në Pragë! Republika e Kosovës është një realitet i pakthyeshëm dhe ne e çmojmë shumë mbështetjen e Çekisë për anëtarësimin e Kosovës në organizatat ndërkombëtare dhe për shtimin e njohjeve të reja”, tha Begaj.
Një pjesë e rëndësishme e bisedimeve iu kushtua bashkëpunimit ekonomik. Begaj tha se vëllimi i shkëmbimeve tregtare mes dy vendeve është në rritje, ndërsa theksoi potencialin për zgjerimin e tyre, sidomos përtej turizmit, në fusha të tjera me interes të ndërsjellë.
“Vëllimi i shkëmbimet tregtare midis dy vendeve, të cilat janë në rritje të vazhdueshme, por potenciali është akoma më i madh. Në veçanti, fusha e turizmit ka treguar rezultate shumë të mira. Ne jemi të gatshëm të zgjerojmë bashkëpunimin tonë përtej fushës së turizmit, në të gjitha fushat për të cilat mendohet se ka interes të ndërsjellë”, tha Begaj.
