Pesë anëtarë të Këshillit Prokurorial të Kosovës i kanë quajtur të pavërteta dhe të pabazuara, sipas tyre, deklarimet e disa anëtarëve të Këshillit se kinse kanë qenë subjekt i “kërcënimeve” gjatë zhvillimeve të fundit në institucion.
“Asnjë fakt, provë apo element objektiv nuk është paraqitur për të mbështetur pretendime të tilla”, thuhet në deklaratën që ka lëshuar për media, Këshilli Prokurorial i Kosovës.
Sipas tyre, nëse ekziston dyshim i bazuar për ndonjë kërcënim, obligim ligjor dhe institucional është që i njëjti të raportohet menjëherë pranë organeve kompetente të sigurisë, e jo, siç kanë thënë, të publikohen deklarata të cilat mund të krijojnë perceptim të rremë, të deformojnë realitetin dhe të dëmtojnë para opinionit publik reputacionin e Këshillit Prokurorial të Kosovës si institucion kushtetues.
“Takimi i KPK-së ka qenë plotësisht i hapur dhe transparent dhe është zhvilluar në prani të publikut dhe mediave. Katër (4) anëtarë të Këshillit, përfshirë Ushtruesin e Detyrës së Kryeprokurorit të Shtetit, kanë zgjedhur ta braktisin takimin me vullnetin e tyre, pa pasur asnjë kërcënim apo presion nga ndonjë anëtar tjetër i Këshillit”, thuhet tutje në deklaratën e tyre.
Sipas këtyre pesë anëtarëve të KPK-së që kanë lëshuar deklaratën, çdo anëtar i KPK-së gëzon pavarësi funksionale dhe imunitet në ushtrimin e detyrave, siç përcaktohet me Kushtetutë dhe legjislacionin relevant.
“Për këtë arsye, deklarimet që aludojnë në presione ose kërcënime ndaj anëtarëve janë të papranueshme, të pajustifikuara dhe të pambështetura në ndonjë fakt juridik apo procedural”, thuhet në deklaratë.
Këshilli Prokurorial i Kosovës ka paralajmëruar se do të caktojë së shpejti një takim të jashtëzakonshëm për këtë çështje “dhe garanton publikun e gjerë se do të mbetet i përkushtuar tërësisht në përmbushjen e mandatit të tij kushtetues dhe ligjor, pavarësisht sfidave dhe përpjekjeve të kujtdo për të penguar këtë synim”, përfundon deklarata e pesë anëtarëve KPK-së.
Për këtë çështje më herët ka folur edhe presidentja e shtetit.
Ajo tha se pas deklaratës publike të pesë anëtarëve të KPK-së se nuk ndjehen të sigurt, në komunikim me qeverinë ka ndërmarrë veprimet e nevojshme.
“Është e pafalshme që 26 vjet pas luftës ne të kemi anëtarë të KPK-së qofshin ata prokuror apo joprokuror që nuk ndihen të sigurt apo të kërcënuar. Është me rëndësi që ata të ndihen të sigurt dhe të kenë mundësi të shprehin qëndrimet e tyre. Sistemi i drejtësisë në vend për një kohë të gjatë është ballafaquar me sfida sa i përket profesionalizimit, integritetit, pavarësisë dhe paanshmërisë. Është me rëndësi që deklaratat e mija të mos shihen si ndonjë ndërhyrje, sepse jam person politik që kurrë në karrierën time nuk kam ndërhyrë në sistemin e drejtësisë, që t’i lëmë vend edhe analizës së përbashkët që e kemi me partnerët tanë lidhur me procesin që ka ngjarë sa i përket tentim shkarkimit”, deklaroi Osmani.
