Negociata intensive janë duke u zhvilluar për t’i dhënë fund luftës në Ukrainë. Kujtojmë se plani origjinal prej 28 pikash SHBA-Rusi kërkonte që Ukraina të tërhiqej nga qytetet që kontrollon në Donbas, të kufizonte ushtrinë e saj dhe të hiqte dorë nga anëtarësimi në NATO.
Megjithatë, pas bisedimeve në Zvicër të dielën, të udhëhequra nga Sekretari i Shtetit i SHBA-së, Marco Rubio, dhe shefi i stafit të Zelensky-t, Andriy Yermak, plani u rishikua në mënyrë drastike. Versioni i ri tani ka vetëm 19 pika, dhe Kievi dhe partnerët e tij evropianë këmbëngulin që vija ekzistuese e frontit duhet të jetë pika fillestare për çdo diskutim territorial.
Një plan i propozuar paqeje që po diskutohet me SHBA-në dhe Evropën përfshinte pikat “e duhura”, por çështjet e ndjeshme ende duhet të diskutohen me Donald Trump, tha presidenti ukrainas Volodymyr Zelensky.
“Deri më tani, pas bisedimeve të Gjenevës, ka më pak pika, nuk ka më 28 dhe shumë elementë të saktë janë përfshirë në këtë kuadër”, tha presidenti ukrainas në fjalimin e tij video në mbrëmje.
“Kjo është vërtet qasja e duhur. Do të diskutoj çështjet e ndjeshme, pikat më delikate, me Presidentin Trump”, njoftoi ai.
Karoline Leavitt, zëdhënësja e Donald Trump, foli me gazetarët jashtë Shtëpisë së Bardhë.
Ajo tha se bisedimet për t’i dhënë fund luftës në Ukrainë kishin qenë produktive, por se mbetën disa pika mosmarrëveshjeje. “Një plan i rishikuar duhet t’u paraqitet përsëri rusëve”, vuri në dukje ajo.
Ajo tha se ende nuk ka plane që Trump dhe Presidenti ukrainas Volodymyr Zelensky të takohen këtë javë. “Ekziston një ndjenjë urgjence. Presidenti dëshiron që kjo marrëveshje të arrihet dhe kjo luftë të përfundojë. Trump po ushtron shumë presion mbi të dy udhëheqësit”, shtoi ajo.
Kur u pyet nëse Trump po e përmbushte afatin e tij të së enjtes për të arritur një marrëveshje me Ukrainën, ajo u përgjigj se Trump dëshiron që kjo marrëveshje “të arrihet sa më shpejt të jetë e mundur”.
Ajo konfirmoi se lufta në Ukrainë u përmend gjatë telefonatës së sotme midis Trump dhe Presidentit kinez Xi Jinping, por se fokusi ishte ende në marrëdhëniet SHBA-Kinë.
