Komisioni Qendror i Zgjedhjeve ka certifikuar rezultatet përfundimtare të raundit të dytë të zgjedhjeve për kryetarë komunash që u mbajt me 9 nëntor në 18 komuna në Kosovës.
Rezultatet u certifikuan për Gjakovën, Gjilanin, Dragashin, Kaçanikun, Klinën, Fushë Kosovën, Mitrovicën e Jugut, Obiliqin, Rahovecin, Pejën, Prishtinën, Prizrenin, Suharekën, Vitinë, Vushtrrinë, Junikun, Mamushën dhe Kllokotin.
Edhe në këtë mbledhje, anëtarët e LVV-së në KQZ, kanë votuar kundër certifikimit të rezultatit për komunën e Kllokotit.
Më herët, KQZ kishte certifikuar rezultatin edhe për 20 komuna të tjera në të cilat fituesi ishte zgjedhur me 12 tetor.
Gjithashtu, në këtë mbledhje u miratua zëvendësimi i këshilltarëve komunal. Emra të rinj sipas radhës, zëvendësuan emrat e atyre që ishin në garë për kryetar komunash e edhe pjesë e listës për Kuvende Komunale, e që hoqën dorë nga kjo e fundit pas zgjedhjes në krye të komunave.
Aty gjithashtu u kërkua që zëvendësimet që u bënë t’i përcillen komunave, meqë u tha se shumë prej Kuvendeve Komunale i kanë thirrur seancat për konstituimin e përbërjes së re të Kuvendeve Komunale të dalë nga zgjedhjet e 12 tetorit.
Kryetari Kreshnik Radoniqi, tha se vendimet janë duke u përgatitur. “Sot do të nënshkruhen të gjitha, protokollohen , dërgohen me e-mail dhe gjithçka do të kryhet sot”, tha ai.
Ndërkaq, nga zgjedhjet për Kuvende Komunale, KQZ ende nuk ka certifikuar rezultatet për Kuvendin Komunal të Istogut meqë ende është aktive një ankesë.
