Kryetari i Aleancës për Ardhmërinë e Kosovës, Ramush Haradinaj, ka kujtuar sot përvjetorin e aktvendimit të pafajësisë nga Gjykata e Hagës, duke e cilësuar këtë ditë si një nga më të rëndësishmet e jetës së tij, që vulosi drejtësinë e luftës çlirimtare të UÇK-së.
Haradinaj ka bërë të ditur se rrugëtimi i tij ligjor nisi më 17 nëntor 2004, kur u ftua për herë të parë nga Gjykata e Hagës, dhe vazhdoi deri më 29 nëntor 2012, kur drejtësia u vendos përfundimisht. Ai kujton se, ndonëse u shpall i pafajshëm në gjykimin e parë, vite më pas u ftua në rigjykim për ta dëshmuar edhe një herë të vërtetën e luftës së UÇK-së.
“Sot, 13 vite më pas, atë aktvendim të pafajësisë e kujtoj si fitore jo vetëm për mua, por për gjithë luftën tonë çlirimtare. Lufta ime për të vërtetën zgjati po aq sa lufta për liri, dhe në të dyja dola fitimtar”, ka shkruar ai.
Haradinaj shtoi se gjatë gjithë këtij rrugëtimi, në luftë dhe në paqe, është kujdesur që çdo veprim i tij t’i sjellë vendit vetëm nder dhe fitore.
Ai ka shprehur mirënjohjen për gjithë ata që nuk e humbën kurrë besimin në pafajësinë e tij: “Faleminderit të gjithëve që qëndruat pranë meje në çdo rrethanë.”
