Këtë e ka konfirmuar Ministria e Punëve të jashtme dhe Diasporës përmes një njoftimi që thotë se arrestimi i tij ish-policit kosovar që kishte shërbyer për rreth 14 vite në këtë detyrë, kishte ndodhur në orët e para të mëngjesit të sotëm, derisa ai po udhëtonte drejt Bujanocit së bashku me bashkëshorten dhe fëmijët e tyre.

“Ministria e Punëve të Jashtme dhe Diasporës konfirmon se në orët e para të mëngjesit të sotëm, Nexhat Pireva, shtetas i Republikës së Kosovës nga Kamenica dhe ish-pjesëtar i Policisë së Kosovës për rreth 14 vite, është arrestuar nga autoritetet serbe në pikën kufitare të Dheut të Bardhë. Ai po udhëtonte drejt Bujanocit së bashku me bashkëshorten dhe fëmijët e tyre. Pas marrjes në pyetje për rreth katër orë, z. Pireva është liruar dhe aktualisht ndodhet në liri”, thuhet në njoftimin e MPJD-së.

Ministria e Punëve të Jashtme dhe Diasporës ka dënuar veprimet e autoriteteve serbe, derisa u ka bërë thirrje kosovarëve që të shmangin kalimin përmes territorit të Serbisë.

“Ministria e Punëve të Jashtme dhe Diasporës dënon veprimet e vazhdueshme të autoriteteve serbe, të cilat përbëjnë keqtrajtim të shtetasve të Republikës së Kosovës dhe janë në kundërshtim me marrëveshjet e nënshkruara mes dy shteteve. MPJD u bën thirrje qytetarëve të Republikës së Kosovës që të shmangin kalimin përmes territorit të Serbisë deri në informacione të mëtejshme, për të siguruar mbrojtjen e tyre”, thotë MPJD-ja.