Avokati i Popullit, Naim Qelaj, tha se mbrojtja e të drejtave themelore po vihet gjithnjë e më shumë në pikëpyetje.
Gjatë konferencës ndërkombëtare me temë “E Ardhmja e të Drejtave të Njeriut në mes të Transformimeve Globale: Sfidat Kombëtare dhe Detyrimet Ndërkombëtare”, në kuadër të shënimit të 25 vjetorit të themelimit të institucionit të Avokatit të Popullit, ai paralajmëroi se inteligjenca artificiale dhe zhvillimi i shpejtë teknologjik po krijojnë rreziqe të reja për privatësinë dhe liritë individuale, me ndikim më të madh se çdo mekanizëm tradicional shtetëror.
“Algoritmat sot kanë fuqinë të ndikojnë drejtpërdrejt në të drejtat tona, madje më shumë se dështimi i një autoriteti publik. Është thelbësore të ruajmë parimet mbi të cilat brezat kanë kontribuar”, tha ai.
Kryetari i Kuvendit Dimal Basha, tha se në kohë krizash globale, shtetet nuk duhet ta humbasin fokusin nga individi si bartës i së drejtave dhe lirive.
“Shoqëritë demokratike nuk duhet të dorëzohen para presioneve që privilegjojnë kolektivin në emër të stabilitetit. Në epiqendër duhet të mbetet dinjiteti i njeriut”, ka thënë Basha.
Ndërsa kryetari i Gjykatës Kushtetuese, Nexhmi Rexhepi, nënvizoi se pavarësia e gjyqësorit mbetet garancia kryesore për besimin e qytetarëve në drejtësi.
“Një Kushtetutë jeton përmes zbatimit dhe respektimit të saj. Pavarësia e gjyqësorit është e drejtë e qytetarëve për drejtësi të paanshme”, tha Rexhepi, duke shtuar se institucionet duhet të jenë të gatshme për sfidat që sjell digjitalizimi dhe mbikëqyrja e të dhënave.
Drejtoresha e Agjencisë së BE-së për të Drejtat Themelore, Sirpa Rautio, theksoi se mbrojtja dhe promovimi i të drejtave të njeriut është themeli i paqes dhe drejtësisë në Evropë.
Në një kohë transformimesh teknologjike dhe tensionesh globale, mesazhi kryesor i konferencës ishte i qartë: mbrojtja e të drejtave të njeriut duhet të qëndrojë në qendër të politikave publike dhe zhvillimeve teknologjike.
