Anëtari i KQZ-së nga radhët e Lëvizjes Vetëvendosje (LVV), Alban Krasniqi, ka reaguar pas deklaratave të ambasadorëve në Kosovë që kritikuan moscertifikimin e Listës Serbe, duke thënë se shqetësimi i vërtetë për ta do të duhej të ishte ngulfatja e të drejtës demokratike dhe pjesëmarrjes politike të komunitetit serb nga vet Lista Serbe.
Krasniqi ka përmendur edhe veprimet kriminale dhe sulmet serbe të kryera në veri nga persona që dikur drejtonin këtë parti.
“Të dashur ambasadorë, shqetësimi i vërtetë do të duhej të ishte ngulfatja e ushtrimit të të drejtës demokratike dhe pjesëmarrjes politike të komunitetit serb nga ana e Listës Serbe, e cila, përveç faktit që është pjesëmarrëse direkte në sulmet dhe veprimet kriminale e terroriste kundër rendit kushtetues, gjithashtu kontrollon dhe menaxhon financat e Vuçiqit në Kosovë, duke shantazhuar qytetarët serbë dhe duke i përdorur ato mjete për financimin e kriminelëve që kanë sulmuar, përveç Policisë së Republikës së Kosovës, edhe vet pjesëtarët e KFOR-it, pra bashkëkombasit tuaj. Së dyti, shqetësuese është heshtja juaj ndaj bllokimit që opozita, bashkë me Listën Serbe, po i bëjnë ushtrimit të së drejtës demokratike të mërgatës për të votuar”, ka shkruar ai në Facebook.
