Zyra e Bashkimit Evropian në Kosovë ka njoftuar se gjatë takimit të mbajtur me anëtarët e Këshillit Prokurorial të Kosovës (KPK), ka kërkuar zbatimin e plotë dhe të përbashkët të reformës së këtij institucioni.
Sipas njoftimit, BE thekson se sundimi i ligjit mbetet parakusht thelbësor për procesin e integrimit evropian të Kosovës.
“Zyra e BE-së në Kosovë u bëri thirrje sot të gjithë anëtarëve të KPK-së që të zbatojnë në tërësi reformën, të sigurojnë ligjshmërinë e vendimeve të tyre, të veprojnë me integritet dhe të ruajnë besimin e publikut në sistemin e drejtësisë”, thuhet në njoftim.
Kjo kërkesë e BE-së vjen pas shkarkimit të ushtruesit të detyrës së kryeprokurorit Besim Kelmendi dhe tensioneve të brendshme në KPK, të cilat kanë ngritur shqetësime për funksionimin e institucionit. Për këto zhvillime, Zyra e BE-së ka thirrur dje një takim urgjent me të gjithë anëtarët e Këshillit.
Ndërkohë, tre organizata të shoqërisë civile kanë paralajmëruar rritje të rrezikut të kundërligjshmërisë brenda KPK-së dhe kanë kërkuar ndërhyrjen e gjykatës për të garantuar respektimin e ligjit dhe procedurave.
