Policia e MOLDAVIsë ka kryer më shumë se 50 kontrolle në të gjithë vendin si pjesë e një operacioni në shkallë të gjerë kundër një grupi të organizuar të dyshuar për planifikimin e trazirave masive dhe destabilizimin e vendit. Anëtarët e grupit ishin trajnuar më parë në Serbi, shkruan N1 Serbia .
Veprim kundër një grupi të organizuar
Sipas njoftimit për shtyp të policisë moldave, pas mbledhjes së provave, anëtarët e Inspektoratit për Luftimin e Krimit të Organizuar kryen kontrolle që përfshinë më shumë se 35 persona, të moshës midis 21 dhe 54 vjeç.
Gjatë operacionit, u konfiskuan telefona celularë me informacione të rëndësishme për hetimin, karta SIM dhe bankare, disa prej të cilave të lëshuara në Rusi, si dhe valutë e huaj, përfshirë 3,350 dinarë serbë. Policia gjeti gjithashtu më shumë se 20 pasaporta biometrike me vula për kalimin e kufirit me Serbinë, stacione radioje, një pushkë, municione të kalibrave të ndryshëm dhe prova të tjera relevante për rastin.
Qëllimi – të provokojë protesta të dhunshme
Policia moldave pretendon se qëllimi i grupit ishte të shkaktonte tensione sociale që do të çonin në protesta të dhunshme, të cilat do të kërcënonin rendin publik dhe sigurinë e qytetarëve. Njoftimi për shtyp shtoi se stërvitja e grupit u zhvillua nën mbikëqyrjen e instruktorëve të huaj në kampin në Banja Koviljača në Serbi.
Sipas informacioneve nga hetimi, grupi ka vepruar që nga korriku i këtij viti me qëllim kryerjen e aktiviteteve të paligjshme në shkallë të gjerë në këmbim të kompensimit financiar.
Lidhja me arrestimet në Serbi
Ky rast lidhet me ngjarjet e shtatorit, kur Ministria e Punëve të Brendshme serbe raportoi arrestimin e dy personave. Ata u arrestuan, në bashkëpunim me Agjencinë e Sigurisë dhe Informacionit (BIA), me dyshimin për trajnimin e një grupi prej 150 deri në 170 shtetasish rumunë dhe moldavë pranë Loznicës për t’i rezistuar fizikisht policisë moldave në rast trazirash gjatë zgjedhjeve. Sipas Ministrisë së Punëve të Brendshme serbe, trajnimi luftarak-taktik i këtij grupi u zhvillua midis 16 korrikut dhe 12 shtatorit.
