Sot janë publikuar numrat e partive politike në fletëvotimet e zgjedhjeve të parakohshme parlamentare. Me këtë rast, udhëheqësit e subjekteve kanë bërë reagime në rrjetet sociale, e disa prej tyre kanë shpalosur edhe sloganet e kësaj gare.
“Kemi numrin 116. Bashkë me qytetarët angazhohemi për një fitore edhe më të madhe”, ka shkruar kreu i LVV-së, Albin Kurti, në Facebook.
Bedri Hamza i PDK-së ka thënë se numri 130 qëndron si “numri i bashkimit për Kosovën”.
“Është numri i stabilitetit, normalitetit dhe zhvillimit ekonomik. Është numri i drejtimit të sigurt dhe rrugës evropiane për vendin tonë. 130 është numri i fitores!”, ka shkruar Hamza.
Ndërkohë, LDK e ka ndërlidhur programin e vet qeverisës me shpresën për vendin.
“Zgjedh shpresën! 123 është numri ynë!”, ka shkruar Lumir Abdixhiku.
“Krah teje” është slogani me të cilin do të garojë Aleanca për Ardhmërinë e Kosovës.
“129 është numri i AAK-së në këto zgjedhje. Të renditur e në rresht si një, jemi krah teje Kosovë. Kosova na thërret! Na priftë e mbara!”, ka shkruar Ramush Haradinaj.
Në anën tjetër, NISMA në këto zgjedhje mban numrin 122, ndërsa deri më tani nuk ka pasur ndonjë reagim në rrjetet sociale nga kreu i saj, Fatmir Limaj.
Ndërkohë, sot KQZ-ja i ka tërhequr numrat për renditjen e subjekteve politike në fletëvotimin e zgjedhjeve të parakohshme për Kuvendin e Kosovës.
