Presidenti i Serbisë, Aleksandar Vuçiç, ka njoftuar se do t’u propozojë udhëheqësve të Bashkimit Evropian që i gjithë Ballkani Perëndimor të pranohet në anëtarësim në të njëjtën kohë. Ai do ta paraqesë idenë e tij nesër në Bruksel në një takim me Presidenten e Komisionit Evropian, Ursula von der Leyen, dhe Presidentin e Këshillit Evropian, Antonio Costa, shkruan N1info.rs .
E ardhmja e rajonit dhe e Evropës
Duke folur në forumin Beltalks – Beograd Economic Talks, Vuçiç theksoi se një qasje e përbashkët është çelësi i stabilitetit. “Hyrja e Ballkanit Perëndimor në tërësinë e tij në BE është ideja më e mirë. Nëse dikush qëndron jashtë, çfarë do të bëni me ato vende? Dhe e di që të gjithë po flasin për harmonizim, por kjo nuk ka të bëjë vetëm me të ardhmen e rajonit, por me të ardhmen e Evropës”, tha Vuçiç.
Ai shtoi se beson që një vendim i tillë do të kishte një efekt pozitiv tek të gjithë. “Nëse do të pranoheshim të gjithë së bashku, pa përjashtim, të gjithë do të ndiheshin më mirë, si shqiptarët ashtu edhe boshnjakët… Dëgjoj vetëm reagime pozitive për këtë ide dhe këtë do t’ua them Antonio Costa-s dhe Ursula von der Leyen-it”, tha ai.
Serbia në rrugën e saj drejt BE-së
Vuçiç vuri në dukje se Serbia “ka bërë tashmë shumë gjëra”, por gjithashtu pranoi se “duhet të përparojë në rrugën e saj drejt BE-së”.
Ai konfirmoi se nesër ka një “takim të madh dhe të rëndësishëm” për të marrë pjesë në formën e një darke të organizuar nga Presidenti i Komisionit Evropian, në të cilën, përveç tij, i ftuar do të jetë edhe Presidenti i ri i Këshillit Evropian, Antonio Costa.
