Presidenti serb Aleksandar Vuçiç e gjeti veten në qendër të vëmendjes pasi kamerat kapën bisedën e tij të shkurtër me Presidenten e Komisionit Evropian Ursula von der Leyen në Bruksel mbrëmë. Me të mbërritur në takim, Vuçiç i tha asaj se “sapo kishte marrë një mesazh nga Moska”, të cilit ajo iu përgjigj: “Në rregull, le të presim dhe të shohim”.
Regjistrimi u publikua nga gazetarja e Eurones, Maria Tadeo.
Ky shkëmbim i shkurtër, por domethënës, tërhoqi shpejt vëmendjen e gazetarëve evropianë, veçanërisht duke pasur parasysh momentin e ndjeshëm në marrëdhëniet midis Bashkimit Evropian dhe Rusisë. Brukseli e ka kritikuar vazhdimisht Serbinë për mospërputhje me politikën e jashtme të BE-së, veçanërisht ndaj Moskës.
Për momentin, nuk dihet se për çfarë referohej konkretisht mesazhi i Vuçiçit dhe asnjëra palë nuk ka komentuar zyrtarisht ende për këtë ngjarje.
