Pragu zgjedhor prej 5% vazhdon të mbetet sfidë për subjektet politike. Nëpër procese zgjedhore, shumë prej tyre mbesin jashtë legjislativit, në mungesë të votave të parapara, për t`u bërë subjekt parlamentar.
8 subjekte politike shqiptare me gjithsej 624 kandidatë, janë në garë në zgjedhjet e 28 dhjetorit për të fituar ulëse në Kuvendin e Kosovës. Të gjitha këto subjekte, për të fituar ulëse në Kuvendin e Kosovës, duhet të fitojnë së paku 5% nga numri i përgjithshëm i votave të vlefshme.
Por, çfarë ndodh me votat e subjekteve politike që nuk arrijnë ta kalojnë pragun zgjedhor?
Në praktikë, kjo nënkupton se sa më i vogël të jetë numri i subjekteve politike që kalojnë pragun zgjedhor dhe marrin pjesë në ndarjen e mandateve, aq më i madh është numri i ulëseve që përfitojnë partitë që arrijnë të hyjnë në Kuvend.
Zëdhënësi i KQZ-së, Valmir Elezi, sqaron për RTK-në se votat e subjekteve politike që nuk e kalojnë pragun zgjedhor nuk shpërndahen tek subjektet tjera që kanë fituar ulëse, por rezultati certifikohet ashtu siç evidentohet.
“Komisioni Qendror i Zgjedhjeve, pasi të përfundon të gjitha procedurat e parapara me ligj dhe aktet nënligjore, certifikon rezultatet e të gjitha subjekteve politike dhe kandidatëve ashtu siç janë evidentuar gjatë procesit të numërimit. Pra, në rezultatet e certifikuara përfshihet edhe rezultati i subjekteve politike që nuk e kalojnë pragun zgjedhor, që nuk fitojnë ulëse”, ka thënë ai.
E sa i përket ndarjes së ulëseve në Kuvendin e Kosovës, Elezi sqaron se ka për bazë Ligjin për Zgjedhjet e Përgjithshme, porse në këtë ndarje mbesin jashtë subjektet politike që nuk kalojnë pragun prej 5%.
“Ajo që bën KQZ është zbatimi i formulës për ndarjen e ulëseve, ashtu siç është e përcaktuar në Ligjin për Zgjedhjet e Përgjithshme. Në këtë proces, merren parasysh vetëm rezultatet e subjekteve politike që kanë kaluar pragun zgjedhor prej 5%. Votat e subjekteve që mbeten nën këtë prag nuk përfshihen në përllogaritjen e mandateve. Pra, KQZ ndan ulëset vetëm ndërmjet subjekteve që e kanë kaluar pragun zgjedhor”, tha ai.
Rrjedhimisht votat e subjekteve politike që nuk e kanë kaluar pragun zgjedhor nuk kanë asnjë rëndësi në përcaktimin e ulëseve të reja në Kuvend.
“Votat e të gjitha partive politike të cilat nuk e kalojnë pragun zgjedhor shpërndahen prej fituesit të zgjedhjeve, pra partisë që i fiton zgjedhjet, deri te ai që është i fundit që e ka kaluar pragun zgjedhor, pra të gjitha partitë fitojnë nga shpërndarja e kësaj vote”, tha analisti politik, Blerim Burjani.
Nga numri i përgjithshëm prej 120 ulëseve në Kuvendin e Kosovës, 20 vende janë të garantuara për përfaqësimin e pakicave kosovare dhe subjektet politike të tyre nuk i nënshtrohen pragut zgjedhor.
