Të paktën tre persona u vranë dhe nëntë u plagosën në një sulm që tronditi kryeqytetin e Tajvanit, Taipei, mbrëmë. Sulmuesi, i armatosur me një thikë dhe bomba tymi, përhapi panik në stacionet e metrosë gjatë orës së pikut dhe më vonë vdiq pasi ra nga një ndërtesë ndërsa policia përpiqej ta arrestonte, raporton BBC .
Aktivizoi bomba tymi dhe kokteje Molotov, pastaj nisi një sulm me thikë
Sulmi filloi rreth orës 17:20 sipas orës lokale në stacionin kryesor të metrosë në Taipei. Sipas kryeministrit tajvanez Cho Jung-tai, i dyshuari 27-vjeçar, i identifikuar si Chang Wen, fillimisht shpërtheu bomba tymi dhe kokteje Molotov. Një burrë që u përpoq ta ndalonte u godit me një objekt të topitur dhe më vonë vdiq në spital.
Pas kësaj, sulmuesi iku përmes qendrës tregtare nëntokësore drejt stacionit të afërt Zhongshan, rreth 800 metra larg. Gjatë rrugës, ai u ndal në hotelin e tij për të marrë armë, pastaj u kthye në rrugën jashtë stacionit të Zhongshan ku vendosi bomba tymi shtesë dhe sulmoi rastësisht kalimtarët me thikë.
Njerëzit po iknin me vrap në panik.
Pamjet në mediat sociale tregojnë njerëz që ikin në panik ndërsa një sulmues i veshur me të zeza hedh bomba tymi. Duke ikur nga policia, sulmuesi hyri në një librari dhe dyqan aty pranë. Pasi policia e rrethoi, ai ra nga ndërtesa dhe vdiq pak më vonë në spital. Motivi i tij mbetet i panjohur për momentin.
Kryeministri Cho Jung-tai urdhëroi masa të shtuara sigurie në stacionet e metrosë, stacionet e trenave dhe aeroportet.
