Kryetari i Lidhjes Demokratike të Kosovës, Lumir Abdixhiku, së bashku me familjen Zemaj dhe bashkëpunëtorë, kanë bërë homazhe me rastin e 23-vjetorit të vrasjes së Kolonelit Tahir Zemaj, djalit të tij Enis Zemaj dhe Hasan Zemajt, kryetar i Forumit të Rinisë së LDK-së në Deçan.
Me këtë rast, është kujtuar figura dhe kontributi i Kolonel Tahir Zemajt, duke e cilësuar atë si patriot, ushtarak vizionar dhe strateg të luftës, i cili udhëhoqi beteja të rëndësishme të Ushtrisë Çlirimtare të Kosovës në zonën e Dukagjinit kundër regjimit serb.
“Janari i vitit 2003 mbetet një nga periudhat më të rënda për Kosovën, kur u ekzekutuan Kolonel Tahir Zemaj, djali i tij Enisi dhe Hasan Zemaj. Një krim që edhe sot rëndon ndërgjegjen e shoqërisë sonë”, thuhet në njoftim.
Po ashtu është thënë se Kolonel Tahir Zemaj ishte veprimtar i hershëm i LDK-së dhe bashkëpunëtor i afërt i ish-presidentit të Kosovës, Ibrahim Rugova, duke mbetur simbol i sakrificës, dinjitetit dhe përkushtimit ndaj shtetit të Kosovës.
Në 23-vjetorin e vrasjes, u theksua gjithashtu se dhimbja dhe padrejtësia mbeten të hapura për familjen Zemaj dhe për LDK-në, pasi autorët e këtij krimi ende nuk janë ndëshkuar.
“Lavdi jetës dhe veprës e Kolonel Tahir Zemajt, Enis Zemajt dhe Hasan Zemajt”, thuhet tutje në njoftim.
