Komuna e Prishtinës ka njoftuar se gjatë ditëve në vijim pritet përkeqësim i kushteve atmosferike, i shoqëruar me temperatura të ulëta, ngrica dhe reshje bore, duke u bërë thirrje qytetarëve që të tregojnë kujdes të shtuar gjatë qarkullimit.
Sipas njoftimit, qytetarëve u rekomandohet që të kufizojnë lëvizjet vetëm në raste të domosdoshme, të përdorin pajisjet e detyrueshme të dimrit, të shmangin shpejtësinë e lartë dhe të respektojnë sinjalistikën rrugore.
Komuna ka bërë të ditur se si pasojë e kushteve të pafavorshme atmosferike, mund të ketë vonesa në disa linja të Transportit Publik Urban.
“Në zonat ku vlerësohet rrezik për qarkullim të sigurt, transporti publik do të pezullohet përkohësisht deri në normalizimin e kushteve, ndërsa qytetarët do të njoftohen me kohë për çdo ndryshim. Për çdo pengesë në qarkullim apo situatë që kërkon ndërhyrje, qytetarët mund të kontaktojnë Qendrën e Thirrjeve në numrat pa pagesë 0800 122 33 dhe 0800 122 44”, thuhet në njoftim.
Komuna e Prishtinës ka falënderuar qytetarët për bashkëpunimin dhe mirëkuptimin.
