Ura në fshatin Beluçe të Leposaviqit nuk do të jetë e kalueshme, pas dëmeve që pësoi si pasojë e vërshimeve që përfshinë shumë zona të territorit të Kosovës. Si shkak i vërshimeve, Policia e Kosovës në veri thotë se kanë evakuuar katër familje të cilave iu përmbytën shtëpitë nga vërshimet në Mitrovicën e Veriut. Kanë bërë të ditur se situata është nën monitorim të vazhdueshëm.
“Pas situatës së krijuar si pasojë e vërshimeve të fundit, gjendja e sigurisë dhe rendit publik në veri të vendit është nën monitorim të vazhdueshëm”, thotë Policia.
Tutje kanë treguar se në vazhdimësi ka qenë e angazhuar në terren dhe në koordinim të plotë me institucionet e tjera relevante, përfshirë komunat përkatëse, Njësinë e Zjarrfikësve dhe Agjencinë për Menaxhimin e Emergjencave, me qëllim të menaxhimit të situatës dhe parandalimit të rreziqeve të mundshme për qytetarët.
“Vërshime janë evidentuar në qytetin e Zveçanit dhe në Mitrovicë Veri. Ndërkaq, më datë 08.01.2025, Policia e Kosovës ka pranuar informatë se në fshatin Beluçe te Leposaviqit, si pasojë e vërshimeve, një urë ka pësuar dëmtime, ku njëra këmbë e urës është dëmtuar. Lidhur me këtë rast, Policia ka njoftuar zyrtarët komunal të Leposaviqit si dhe përfaqësuesit nga Ministria e Infrastrukturës, të cilët kanë dalë në terren dhe kanë konstatuar se, për shkak të rrezikut për sigurinë, ura duhet të mbyllet. Si rezultat, ura është mbyllur përkohësisht deri në një vendim të radhës. Po ashtu, gjatë këtyre ditëve, në qytetin e Mitrovicës së Veriut janë evakuuar katër (4) familje, pasi shtëpitë e tyre janë përmbytur si pasojë e vërshimeve”, thuhet në njoftimin e policisë.
Policia thotë se situata aktualisht është e menaxhueshme dhe po vazhdojnë monitorimin e gjendjes në terren.
U kanë bërë thirrje qytetarëve që për çdo vështirësi apo rast emergjent mund të kontaktojnë Policinë e Kosovës në numrin 192.
Policia e Kosovës thotë se mbetet e përkushtuar në ofrimin e shërbimeve, mbrojtjen e jetës dhe pronës së qytetarëve, veçanërisht në situata emergjente kur vendi përballet me rreziqe natyrore.
