Pas rezultateve jo të mira në zgjedhjet e 28 dhjetorit, kryetari i Lidhjes Demokratike të Kosovës (LDK), Lumir Abdixhiku deklaroi sot pas mbledhjes me bashkëpunëtorët e tij, se do të ofrojë dorëheqjen e tij në Kuvendin e partisë, i cili pritet të mbahet së shpejti. Ai tha se më pas i mbetet Kuvendit të LDK-së ta pranojë ose refuzimin dorëheqjen përmes votës.
Abdixhiku ka theksuar se ofrimi i dorëheqjes përbën një proces demokratik dhe se Kuvendi i partisë është organi i vetëm kompetent për të vendosur lidhur me këtë çështje. Sipas tij, çdo anëtar i LDK-së ka të drejtë të paraqesë kandidaturë individuale për postin e kryetarit, duke nënvizuar se partia mbetet e bashkuar dhe se të gjitha vendimet merren bashkërisht.
“LDK-ja është unike dhe e bashkuar…Takimi i sotëm ishte joformal, ndërsa i vetmi takim formal do të jetë ai i Kryesisë, që pritet të mbahet javën e ardhshme. Pas mbledhjes së Kryesisë do të mbahet Kuvendi i LDK-së ”, ka deklaruar Abdixhiku.
Ai ka shtuar se në rast se Kuvendi i LDK-së nuk e pranon dorëheqjen e tij, do të jetë i obliguar të vazhdojë ushtrimin e detyrës së kryetarit, duke theksuar se shpërfillja e vendimit të anëtarësisë do të ishte e papërgjegjshme. “Çdo vendim që do të merret do të jetë i përbashkët dhe në përputhje me vullnetin e LDK-së”, ka thënë ai.
