Rasti i hedhjes së gazit lotsjellës në Kuvendin e Kosovës në mars 2018 merr kthesë. Procedura ndaj ministrit në detyrë të Punëve të Brendshme, Xhelal Sveçla, është ndarë dhe do të shqyrtohet veçmas. Ndërkohë, pavarësisht kundërshtimit, gjyqi vazhdon për ish-deputetët e Lëvizjes Vetëvendosje: Salih Zyba, Fitore Pacolli-Dalipi dhe Drita Millaku.
Vendimi u mor pasi Sveçla nuk u paraqit në seancë. Gjyqtari i rastit, Sabit Sadikaj, tha se i pandehuri kishte njoftuar gjykatën për mungesën e tij përmes emailit, duke sqaruar se ndodhet jashtë vendit.
“Mungesën e ka arsyetuar dhe i ka dërguar gjykatës email që gjendet jashtë vendit. Pra, janë plotësuar kushtet e seancës së shqyrtimit gjyqësor që të vazhdojë me të pandehurit e tjerë,” tha Sadikaj.
Avokati i ministrit, Laur Preni, kërkoi nga gjykata të tregojë mirëkuptim për mungesën e klientit të tij, duke theksuar përgjegjësitë e larta shtetërore që ai mban.
Prokurori Valdrin Krasniqi deklaroi se Prokuroria nuk e kundërshtoi vendimin e gjykatës për veçimin e procedurës, duke e konsideruar atë një masë që kontribuon në efikasitetin e procedimit.
Ndërkaq, i pandehuri Salih Zyba dhe mbrojtësi i Fitore Pacolli-Dalipit shprehën kundërshtimin ndaj veçimit të lëndës.
Avokati Lavdrim Salihu tha se ndarja e çështjes do të vështirësonte mbrojtjen efektive dhe se parimi i efikasitetit nuk justifikon vazhdimin e përbashkët të procedurës.
