Klubi i basketbollit Prishtina pritet të emërojë një ushtrues detyre në pozitën e kryetarit. Pak ditë më parë, klubi zgjodhi Bekë Berishën si kryetar të ri, por zgjedhja e tij u kundërshtua nga tifozët e klubit “Plisat”, si dhe nga Ministria e Sportit, e cila rikujtoi se Berisha nuk mund të jetë njëkohësisht kryetar klubi dhe deputet i zgjedhur i Kuvendit të Kosovës.
Të shtunën në mbrëmje, Bekë Berisha zhvilloi një takim me drejtuesit e tifogrupit “Plisat”. Pas takimit, u raportua se ai ka dhënë dorëheqje, por Berisha ndonëse e mohoi këtë, e pranoi se është arritur dakordimi që të emërohet një ushtrues detyre.
“E para, nuk kam dhënë dorëheqje. Jam në komunikim me të gjitha grupet dhe dashamirët e basketbollit, pasi ka pasur disa keqkuptime, të cilat po i sanoj. Në takim kam ftuar përfaqësuesit e tifozëve që të paraqesin kërkesat e tyre, të cilat unë jam i gatshëm t’i përkrah. Por, duhet ta shohim edhe aspektin ligjor. Vendimi është të emërohet një ushtrues detyre i presidentit, që klubi të vazhdojë me punë të mira. Ky do të jetë propozim i grupeve të tifozëve dhe dashamirëve që kanë kontribuar shumë për këtë klub”, tha Berisha pas takimit me “Plisat”.
Ai shtoi se e ka ende një periudhë kohe deri në momentin kur do të japë betimin si deputet.
“Unë nuk di se si do të jetë vendimi i Agjencisë Anti-Korrupsion, por, sido që të jetë, klubi do të jetë në duart e njerëzve dhe dashamirëve të sportit. Për mua ndoshta është e pamundur të ushtroj këtë detyrë. Falënderoj delegatët për besimin e dhënë dhe të gjithë ata që më kanë mbështetur. Kam qenë i gatshëm të punoj me sinqeritet për avancimin e klubit, por është shumë e rëndësishme të ketë unitet. Të gjithë – qytetarët, ‘Plisat’, delegatët dhe ata që kanë punuar deri sot – duhet të jenë së bashku”, shtoi Berisha.
Ai nuk dha emrin e personit që mund të emërohet ushtrues detyre, por theksoi se negociatat janë në vazhdim.
Pas këtyre zhvillimeve, edhe “Plisat” reaguan përmes një komunikate, duke theksuar se situata ka filluar të përmirësohet:
“Për të arritur qëllimet tona, kemi gjetur gatishmërinë e Bekë Berishës, të cilin e falënderojmë për bashkëpunimin, duke hapur rrugë që klubi të kalojë në duart e Plisave dhe të profesionistëve – gjendje kjo që ka munguar për një kohë të gjatë. Sportit dhe qytetit të Prishtinës po u vijnë ditë më të mira. Për detaje të tjera do të informojmë ditëve në vijim. Uniteti te Plisat është i pathyeshëm”, thuhet në komunikatën e tyre.
Ndërkohë, ish-basketbollisti i klubit, Granit Rugova, ka shprehur gatishmërinë për të marrë drejtimin e klubit:
“Sot e ndjej obligim moral të marr përgjegjësi dhe të shpreh vullnetin tim për të pretenduar për pozicionin e kryetarit të klubit të zemrës. Jo për ambicie personale, por sepse besoj se kam njohuritë, përvojën dhe energjinë për ta menaxhuar mirë klubin dhe, së bashku me Plisat, qytetarët e Prishtinës dhe të gjithë dashamirët e klubit, ta çojmë klubin aty ku e meriton”, shkroi Rugova në Facebook.
