Komisioni Qendror i Zgjedhjeve ka vendosur në mënyrë unanime që të shkohet në rinumërim të plotë të votave të kandidatëve për deputetë në çdo komunë të Kosovës. Kjo pasi janë shfaqur shumë parregullsi dhe vjedhje votash të identifikuara.
“Sot, para mbledhjes së KQZ-së, ky raport është diskutuar në mbledhjen e Këshillit për Operacione Zgjedhore, nga ku kanë dalë dy rekomandime kryesore: Rinumërimi i të gjitha vendvotimeve edhe për 28 komunat tjera dhe ndërprerjen e mandatit për përfaqësuesit e subjekteve politike në Komisionin Komunal të Zgjedhjeve në komunën e Prizrenit”, ka deklaruar kryetari i KQZ-së, Kreshnik Radoniqi.
Ai ka thënë se ky vendim është marrë për shkak se ky rajon del të ketë parregullsitë më të mëdha.
“Analiza numerike e veçon komunën e Prizrenit si rastin më ekstrem. Pas rinumërimit në QNR të komunës së Prizrenit janë zbritur nga rezultati 29,343 vota për kandidatë, të cilat u ishin regjistruar atyre në QKN të Prizrenit. Po ashtu, pas rinumërimit u janë shtuar 16,366 vota kandidatëve, të cilat nuk ishin regjistruar saktë në këtë QKN”, ka deklaruar kreu i KQZ-së.
Radoniqi tutje ka theksuar se sipas raportit nga vendvotimet e rinumëruara në Qendrën e Numërimit dhe Rezultateve, rezulton se pas rinumërimit në QNR janë zbritur nga rezultati 36,007 vota për kandidatë, të cilat u ishin regjistruar atyre në QKN. Po ashtu, pas rinumërimit u janë shtuar 20,978 vota kandidatëve, të cilat nuk ishin regjistruar saktë në QKN.
“Votat e Diasporës janë numëruar në QNR e jo në QNK. Nëse ka dyshime për pasaktësi është çështje tjetër, mendoj se duhet bërë konkretisht por ato janë numëruar në QNR dhe nga to ne po i nxjerrim përfundimet dhe nga to po marrim vendime”, tha në anën tjetër anëtari i LVV-së në KQZ, Sami Kurteshi.
Arianit Elshani, anëtari nga PDK në KQZ, tha se duhet bërë shkarkimi i komisionit të plotë komunal në Prizren dhe për zyrtarët e KQZ-së të përfshirë në rast, e të ketë ndëshkim edhe për ta.
“Është lajm i mirë që dallimet mes partive politike kanë qenë të papërfillshme dhe një segment i këtyre zgjedhjeve, minimalisht, ka shkuar mirë. Fatkeqësisht komuna që ka çuar në ekstrem mospërputhjen e votave është Prizreni. Janë disa komuna që gjetjet janë minimale, e për fat të keq për disa komuna të tjera edhe ato duhet të shkojnë në rinumërim sepse s’kemi asnjë argument që nuk duhet”, tha Muharrem Nitaj i AAK-së.
