Koordinatorja nacionale për zgjedhje, prokuroja Laura Pula ka kërkuar nga kryeprokurorët e të gjitha prokurorive themelore që në të gjitha komunat, ku ka përfunduar procesi i rinumërimit të votave, të fillojnë grumbullimin e informatave të nevojshme dhe të sigurojnë prova relevante, që vërtetojnë kryerjen e ndonjë vepre penale që ndërlidhet me procesin zgjedhor.
Për këtë Pula i ka njoftuar zëvendësdrejtorin e përgjithshëm të Policisë, Fehmi Hoti dhe drejtorin e Departamentit të Rendit Publik, Arbnesh Ajvazi, të cilët i ka pritur në takim bashkë me menaxherin e projektit strategjik “Mbrojtja e votës”, Besim Kusari, aty ku temë diskutimi ka qenë fillimi i hetimeve paraprake lidhur me mospërputhjen e votave gjatë numërimit brenda subjekteve politike për deputetë të Kuvendit të Kosovës.
“Më tej koordinatorja nacionale për zgjedhje, prokuroja Laura Pula theksoi se pasi që Komisioni Qendror i Zgjedhjeve vendosi që të ketë rinumërim të plotë në të gjitha komunat, Prokurori i Shtetit do të fillohej grumbullimin e provave të nevojshme në nivel vendi”, thuhet në njoftimin e Prokurorisë së Shtetit.
Ndërkohë, siç bëhet e ditur zëvendësdrejtori i përgjithshëm i Policisë së Kosovës, kolonel Fehmi Hoti potencoi se Policia e Kosovës ka kapacitete të mjaftueshme dhe në kuadër të kompetencave që ka do t’i shërbejë kërkesave të prokurorëve të shtetit.
