Danimarka po propozon që NATO të fillojë operacione mbikëqyrjeje në Groenlandë, me mbështetjen e ishullit Arktik, tha të hënën ministri danez i Mbrojtjes, Troels Lund Poulsen, pas takimit me shefin e NATO-s, Mark Rutte.
“Ne e kemi propozuar, sekretari i përgjithshëm e ka marrë parasysh këtë dhe mendoj se tani mundemi – shpresojmë – të përcaktojmë një kornizë se si kjo mund të konkretizohet”, tha Poulsen për televizionin danez.
Presidenti i SHBA-së, Donald Trump, e ka vënë në provë aleancën transatlantike me kërcënimet për të marrë Groenlandën “në një mënyrë ose në një tjetër”, ndërsa vendet evropiane ngushtojnë radhët kundër planeve të Uashingtonit mbi territorin e gjerë autonom danez.
Udhëheqësit gjermanë dhe francezë i denoncuan si “shantazh” kërcënimet e fundjavës nga Trump për të vendosur tarifa të reja kundër vendeve që kundërshtojnë planet e tij për ishullin Arktik.
Rutte shkroi në X se kishte diskutuar “sa i rëndësishëm është Arktiku – përfshirë Groenlandën – për sigurinë tonë kolektive” me ministrin danez dhe diplomatin më të lartë të Groenlandës.
“Ne do të vazhdojmë të punojmë së bashku si aleatë për këto çështje të rëndësishme”, shkroi ai.
Ministri i Mbrojtjes i Suedisë, Pal Jonson, sugjeroi se një mision i NATO-s “mund të jetë një rrugë përpara”, ndërsa Trump këmbëngul se duhet bërë më shumë për të shmangur kërcënimin e Kinës dhe Rusisë ndaj Grenlandës.
“Po shohim se cila është mënyra më konstruktive që mund të kontribuojmë në këtë përpjekje për forcimin e gjurmës së aleancës në Veriun e Epërm”, tha ai pas një takimi të ministrave nordikë në selinë e NATO-s në Bruksel.
