Sulmet ruse kanë lënë gjysmën e Kievit pa energji elektrike, ngrohje apo ujë, duke e shtyrë qytetin drejt një “katastrofe humanitare”, paralajmëroi të martën kryebashkiaku Vitali Klitschko.
«Largohuni nëse mundeni», u bëri thirrje Klitschko banorëve, ndërsa ekipet e emergjencës nxituan për të rivendosur shërbimet mes një valë të ftohti me temperatura deri në -18°C (0 ° F). Ai tha se rreth 600,000 njerëz kanë ikur tashmë nga Kievi këtë muaj, nga një popullsi prej rreth 3 milionë banorësh.
“Situata është kritike me shërbimet bazë – ngrohjen, ujin, energjinë elektrike. Aktualisht, 5,600 pallate banimi janë pa ngrohje”, tha Klitschko për The Times. Autoriteteve u është dashur të kullojnë sistemin qendror të ngrohjes dhe ujit të qytetit për të parandaluar ngrirjen dhe shpërthimin e tubave.
Klitschko akuzoi Moskën se po përpiqet të “shkaktojë një katastrofë humanitare në qytetin tonë të lindjes, për t’i bërë njerëzit të ngrijnë gjatë dimrit”. Banorët raportojnë apartamente të akullta ku fëmijët nuk mund të përdorin tualetet dhe kondensimi është ngrirë në dritare.
Shkollat dhe çerdhet mbeten të mbyllura, duke i detyruar prindërit të kujdesen për fëmijët në shtëpi që ngrijnë. “Sinqerisht nuk e di si ta përballoj kur nuk mund të përdorësh as tualetin në shtëpi ose ta mbash fëmijën ngrohtë. Vajza ime është tre vjeçe”, tha për Kyiv Post Oles, një banor 30-vjeçar i Kievit dhe arkitekt .
M., një studiuese akademike 25-vjeçare, i tha Kyiv Post se nuk kishte ngrohje, energji elektrike apo ujë pasi u zgjua të martën. “Nuk patëm energji elektrike për më shumë se 17 orë. Edhe macja u ftoh – është 13°C [55°F] në apartament”, tha ajo.
Kateryna, një shkencëtare 33-vjeçare e të dhënave, tha se energjia elektrike u rikthye për pak kohë, duke lejuar “pak ujë të ftohtë… të mjaftueshëm për të shkarkuar tualetin”. Ajo shtoi: “Të jesh në gjendje të nxjerrësh ujë nga tualeti të duket si një luks”.
