Trump të mërkurën u tërhoq papritur nga tarifat që kishte kërcënuar të vendoste kundër tetë vendeve evropiane për të ushtruar presion për kontrollin e SHBA-së mbi Groenlandën, territorin gjysmë-autonom të aleatit të Danimarkës në NATO.
Ishte një kthesë dramatike pak pasi ai këmbënguli se donte të merrte në dorë ishullin, “duke përfshirë të drejtën, titullin dhe pronësinë”.
Ai tha se po zhvillohen bisedime shtesë rreth Groenlandës në lidhje me programin e mbrojtjes nga raketat Golden Dome, një sistem shumështresor prej 175 miliardë dollarësh që do të dërgojë një armë amerikane në hapësirë për herë të parë. Trump ofroi pak detaje, duke thënë se ato janë ende duke u përpunuar.
Kryeministrja daneze Mette Frederiksen tha të enjten se siguria në Arktik është një çështje për të gjithë NATO-n dhe se është mirë dhe e natyrshme që Presidenti i SHBA-së dhe Sekretari i Përgjithshëm i NATO-s Mark Rutte ta diskutojnë atë. Ajo deklaroi se ka folur vazhdimisht me Rutte, përfshirë para dhe pas takimit të tij me Trump në Davos.
“Jam informuar se ky nuk ishte rasti”, tha ajo, duke shtuar se vetëm Danimarka dhe Groenlanda mund të marrin vendime për çështje që kanë të bëjnë me Danimarkën dhe Groenlandën.
Frederiksen tha se Danimarka dëshiron të vazhdojë një dialog konstruktiv me aleatët se si të forcojë sigurinë në Arktik, përfshirë programin amerikan Golden Dome, “me kusht që kjo të bëhet me respekt për integritetin tonë territorial”, theksoi ajo.
I pyetur në një intervistë me Fox News nëse Groenlanda do të mbetej pjesë e Mbretërisë së Danimarkës sipas marrëveshjes së shpallur nga Trump, Rutte u përgjigj se çështja nuk ishte më temë diskutimi me Presidentin Trump.
“Ai është shumë i përqendruar në atë që duhet të bëjmë për të siguruar që të mund ta mbrojmë atë rajon të madh Arktik, ku po ndodhin ndryshime, ku kinezët dhe rusët janë gjithnjë e më aktivë. Ky ishte me të vërtetë thelbi i bisedimeve tona”, tha Rutte.
