Presidentja e Kosovës, Vjosa Osmani, ka folur nga Davosi për takimin dhe bisedën që ka pasur me presidentin amerikan, Donald Trump, gjatë ceremonisë së Bordit të Paqes.
Në një lidhje të drejtpërdrejtë për Top Channel, Osmani bëri të ditur se Trump i ka përcjellë një mesazh pozitiv për Kosovën, duke theksuar se biseda mes tyre ishte konstruktive dhe kishte nisur që gjatë Samitit të OKB-së në Nju Jork, më 28 shtator.
E pyetur për përfaqësimin e Kosovës në këtë ngjarje ndërkombëtare, Osmani sqaroi se sipas Kushtetutës së Kosovës, politika e jashtme udhëhiqet nga presidentja, ndonëse kryeministri Albin Kurti ndodhet gjithashtu në Davos. Ajo theksoi se anëtarësimi i Kosovës në Bordin e Paqes është një sukses i përbashkët institucional.
Presidentja komentoi edhe detajet protokollare të ceremonisë, duke bërë të ditur se vendosja e saj pranë presidentit Trump dhe procedurat e nënshkrimit janë përcaktuar nga Shtëpia e Bardhë. Sa i përket veshjes, Osmani tha se zgjedhja e ngjyrës së kuqe ishte personale, pasi është ngjyra e saj e preferuar.
