Zyrtarë të Drejtorisë së Arsimit në Prishtinë janë duke hetuar detajet që rrjedhën deri te ligjërata e organizatës Nisma e të Rinjve për të Drejtat e Njeriut në Kosovë (YIHR) rreth Gjykatës Speciale në shkollën e mesme, “Xhevdet Doda”, e cila dje shkaktoi reagime te opinioni publik.
Kryetari i Prishtinës, Përparim Rama, tha se nuk ka pasur leje e as koordinim për këtë ligjëratë, teksa shtoi se nuk duhet të ndodhin pa marrëveshje ndërinstitucionale.
“Unë faktikisht kur e mora vesh isha shumë i indinjuar për arsye se nuk ka pasur as leje as koordinim me askënd, as prej drejtorisë as prej kabinetit tim. Kemi ndërmarrë masa të menjëhershme. Pra kush ka bërë një gjë të tillë pa marrë leje, pa koordinim normal që do të ketë edhe veprime të ndryshme. Jam tejet i indinjuar me atë çka kanë bërë, nuk duhet me ndodh kurrë ajo në institucionet tona në qytet e as kund tjetër pa një leje prej Drejtorisë së Arsimit. Ato do të jenë të ndërlidhura me rregulloret në fuqi, do t’i ndërmarrim masat”, tha ai.
Drejtori i Arsimit në Prishtinë, Samir Shahini, në një deklarim për media theksoi se do të merret një vendim për rastin më së largu të hënën.
“Kemi një ekip të Drejtorisë së Arsimit që ka shkuar në shkollë dhe po merr informatat, duke parë dokumentacionin dhe gjithçka tjetër që ka çuar te një aktivitet i tillë pa njoftimin e drejtorisë. Nga proces verbali që do të nxjerret sot ose më së largu deri të hënën, do të merren edhe masat konform procedurave dhe ligjit në fuqi”, deklaroi Shahini, pas mbajtjes së diskutimit “Arsimi në 10 vitet e ardhshme në Kryeqytet” me rastin e shënimit të Ditës Ndërkombëtare të Edukimit.
Në anën tjetër kryetari i Këshillit të Prindërve, Nexhmi Hoxha ka thënë se çkado që mund të cenojë integritetin e fëmijëve, do të hasë në kundërshtim të këshillit.
“Është dashur të jetë në koordinim me Drejtorinë e Arsimit dhe të jetë i njoftuar edhe këshilli i shkollës që e ka marrë këtë vendim. Ne kërkojmë nga DKA, drejtorët në përgjithësi, organizatat e tilla që kanë ligjërime të ndryshme, të kenë kujdes çfarë po ju ofrojnë fëmijëve. Këtë e kemi kërkuar gjithmonë, po e kërkojmë edhe tash”, deklaroi Hoxha në një prononcim.
Sipas reagimit të djeshëm të shkollës, ligjërata ishte organizuar nga YIHR, një organizatë e njohur për ligjërata edukative në shkolla dhe universitete me fokus në edukimin juridik dhe qytetar të të rinjv dhe se e njejta ka realizuar mbi 100 ligjërata të ngjashme në shkolla dhe universitete në mbarë Kosovën.
Ndërkohë, zëdhënësi i Dhomave të Specializuara të Kosovës, Michael Doyle, ka konfirmuar për RTKLive se aktivitetet që kjo gjykatë zhvillon në Kosovë në kuadër të Programit të Outreach-it kanë karakter informues dhe nuk përbëjnë ligjërata.
“Që nga viti 2018, Dhomat e Specializuara të Kosovës (DSK) organizojnë rregullisht aktivitete në mbarë Kosovën me grupe të ndryshme, përfshirë studentë, por edhe anëtarë të komuniteteve lokale, juristë, gazetarë dhe të tjerë, në kuadër të Programit të Outreach-it të Gjykatës”, ka deklaruar Doyle për RTKLive.
Ndërkaq Komuna e Prishtinës dje njoftoi që kjo ligjëratë është mbajtur pa lejen e DKA-së.
