Zyra Kombëtare e Auditimit (ZKA), në kuadër të zbatimit të Planit Vjetor të Auditimit 2025/2026, ka filluar auditimin e performancës me temën “Efikasiteti dhe efektiviteti në procesin e ndërtimeve të larta në Komunën e Ferizajt”, që përfshin periudhën 2021–2025.
Sipas njoftimit, auditimi ka për qëllim vlerësimin e tërë procesit të dhënies së lejeve për ndërtime të larta, duke filluar nga paraqitja e kërkesës për leje ndërtimore e deri në lëshimin e certifikatës së përdorimit.
“Po ashtu, përmes këtij auditimi do të analizohet nëse mekanizmat ekzistues institucionalë garantojnë transparencë, ligjshmëri dhe mbrojtje të interesit publik gjatë procesit të ndërtimit”, thuhet në njoftim.
ZKA thekson se ky auditim përbën vazhdimësi të auditimeve të ngjashme të realizuara më herët në Komunën e Prishtinës dhe Komunën e Fushë Kosovës, të cilat karakterizohen nga zhvillim i shpejtë i ndërtimeve të larta.
