Një person pa shenja jete është gjetur pasditen e sotme brenda një automjeti në lagjen Veternik, në Prishtinë. Rasti është konfirmuar në vendin e ngjarjes nga ekipi mjekësor, ndërsa Policia ka nisur hetimet.
Zëdhënësi i Policisë për kryeqytetin, Enis Pllana, ka bërë të ditur se rreth orës 15:00 Policia ka pranuar informatën se një person pa shenja jete gjendet në një automjet në Veternik, në Prishtinë.
Sipas tij, vdekjen e viktimës, mashkull, e ka konstatuar ekipi mjekësor në vendin e ngjarjes.
Pllana ka theksuar se Policia, në koordinim me Prokurorin e Shtetit, ka nisur hetimet lidhur me vdekjen dhe po vazhdon me ndërmarrjen e të gjitha veprimeve hetimore dhe ekzaminuese, të cilat do të ndihmojnë hetimin e ngjarjes dhe sqarimin e plotë të rrethanave të rastit.
