Komuna e Prishtinës ka njoftuar për zhvillimin e disa aktiviteteve trajnuese të kadetëve të Forcës së Sigurisë së Kosovës (FSK), të cilat do të mbahen gjatë ditëve në vijim në zona të ndryshme të kryeqytetit.
Sipas njoftimit, më 03 shkurt 2026, në zonën e Badovcit, Qendra Studimore Universitare e FSK-së do të realizojë një trajnim në terren për navigim tokësor, me emërtimin “Rruga e Heronjve”.
Ndërkaq, më 06 dhe 07 shkurt 2026, në zonën e Koliqit, Qendra Studimore Universitare e Komandës, Doktrinës dhe Stërvitjes së FSK-së do të zhvillojë një vlerësim praktik për operacione mbrojtëse në terren.
Nga Komuna e Prishtinës bëhet e ditur se ushtrime dhe trajnime të ngjashme janë zhvilluar edhe më parë nga kadetët e FSK-së dhe kanë karakter profesional dhe edukativ, duke mos paraqitur asnjë rrezik për qytetarët.
“ Ju falënderojmë për mirëkuptimin dhe bashkëpunimin tuaj gjatë zhvillimit të këtyre aktiviteteve”, thuhet në njoftim
