Policia e Kosovës ka arrestuar tre të mitur kosovarë, të dyshuar për tentim vjedhjeje në një lokal në lagjen “Dardania” të Prishtinë. Ata u kapën në flagrancë gjatë kryerjes së veprës. Pas intervistimit, me vendim të prokurorit, dy prej tyre janë dërguar në mbajtje, ndërsa një tjetër është liruar në procedurë të rregullt.
Kohët e fundit, janë bërë virale në rrjetet sociale rastet e fëmijëve të mitur që kryejnë vjedhje nëpër banesa, duke shqetësuar qytetarët dhe autoritetet.
Policia ka raportuar gjithashtu raste të tjera të vjedhjeve në të gjithë Kosovën.
Në Istog një qytetar ka raportuar se një person i panjohur ka depërtuar me forcë në lokalin e tij dhe ka vjedhur sende të ndryshme, përfshirë një pistoletë me leje. Njësitë policore kanë dalë në vendin e ngjarjes dhe rasti është njoftuar tek prokurori për hetime të mëtejshme.
Ndërsa në Pejë në rrugën Zahir Pajaziti dy meshkuj kanë raportuar se persona të panjohur kanë thyer xhamat e veturave të tyre dhe kanë vjedhur dy çanta dore që përmbanin dokumente personale dhe para. Rasti është njoftuar tek prokurori dhe hetimet janë duke vazhdua
Policia e Kosovës siguron se po ndërmerr masa për parandalimin e veprave kriminale dhe për mbrojtjen e sigurisë publike.
Gjatë vitit 2025, në Kosovë janë regjistruar mbi 2027 raste të vjedhjeve të rënda. 62 raste të grabitjeve, ndera vjedhjet e përgjithshme kalojnë shifrën e 3500 rasteve. Policia thotë se brenda vitit 2025 janë shkatërruar 20 grupe kriminale dhe janë sekuestruar 1882 armë.
